立法會開返會，呢排唔同委員會都討論緊777嗰份《施政報告》，但777隨時被換走，份嘢到時仲有冇用先？或者因為咁，建制派都廢事認真傾，噚日環境事務委員會有民主派正正經經問黃錦星環保政策，但禮義廉黨主席李慧琼就玩抽水，走去質疑黃錦星呢幾個月有冇落區聽民意，仲話環境局諗住推垃圾徵費，但驚喺咁嘅社會氣氛下，隨時會引嚟更大反彈喎。
講到唔聽民意，禮義廉係表表者，無視反對盲撐送中惡法，絕對係搞亂香港嘅真罪魁禍首。但李慧琼當然唔會反省啦，呢個時候，做委員會主席嘅何君堯，繼朝早司法及法律事務委員會自詡「不但執業，仲掃葉清潔香港」九唔搭八後又再搭嗲，向黃錦星教路叫佢「試下考慮用facebook」宣傳政策。喂阿哥，人哋環境局2013年開始玩大嘥鬼嘅時候，你連議員都未有資格做，大嘥鬼fb專頁仲有藍剔認證，之後仲開埋Ig同年輕一代connect囉。