【黑鏡線索】
要數年度全球最捉蟲入屎忽大獎，喺任何一年，WeWork創辦人Adam Neumann，都高唱入雲。不過佢遇正2019年，面對歷史式強勁對手港產777，都注定要抦埋一邊。事關777耍小聰明搞送中，影響竟然輻射到中美貿易戰台灣大選甚至NBA同電競，都仲未敢講見底。
777政權而家走出嚟講點樣回復舊時，可惜有啲嘢，打開咗個盒，覆水難收，所以政策嘅嘢，有啲唔可以亂咁試，就係咁解。777閹割議會嘅時候，借殺人案過橋嘅時候，睇死香港人冇反抗意志嘅時候，有邊次企喺香港嗰邊諗過？點火嗰個，唔代表可以撲到個火，777開猛火搞到香港人覺醒，然後仲幻想可以回到過去，就同啲viral video裏面啲美國大學生好嚴肅咁研究how to unboil an egg，一樣咁惹笑。
Neumann搞上市 工都冇埋
講返WeWork創辦人。WeWork係Uber之後，搞上市嘅最巨型新經濟公司，一旦搞掂，Neumann就會搖身成為億萬富豪，兼係地球上其中一間最值錢上市公司嘅CEO，點知，唔搞猶自可，一出招股書，罵聲四起，佢嘅集權，遠超一般上市公司CEO，於是同公司有生意上嘅利益衝突啦，又安插勁多親戚啦，又同股不同權啦，佢有乜冬瓜豆腐老婆又有全權揀繼任人啦，甚至私人持有公司個商標，每年收返公司上千萬嘅商標使用權等等。
Neumann權力失控到，連Wall Street都頂唔順，都諗到係幾嚴重，當然，佢燒咗咁多錢，都係賺錢遙遙無期，亦都係好大問題。結果，越演越慘烈，不斷調低招股價，削到剩返上一輪嘅兩成，都仲係唔夠飛，結果最大投資者孫正義頂唔順，叫停咗個上市申請，Neumann仲俾董事局炒咗。短短幾個月，就係因為搞上市，由神枱，跌到連份工都冇埋，仲快手過777。
科技公司板塊公司受追捧，其中一個重要原因，係因為軟件本身，每複製多件，基本上冇marginal cost，而互聯網又令顧客自助買嘢，將每賣一件嘅嘅交易成本壓到接近零。於是，兩樣加埋嘅公司，投資大部份係前期，邊際利潤巨大。如果再加埋有network effect就好屈機。經典例子係如Google同facebook，無論用戶定廣告商都自助，而每多一個人用，成本唔差多少。而且越多用戶，就越多廣告商。
錯就要認 無謂攬炒
科技公司有光環，問題係，叫自己做科技公司嘅，唔一定有以上特質。正如有用軟件營運，唔代表軟件係business model嘅核心，唔通樓下茶餐廳用收銀軟件又係科技公司。WeWork空有科技包裝，披着獨角獸皮，骨子裏係一間勁燒錢嘅地產公司。Cowork space可能可以係好大嘅生意，但暫時嘅做法，睇唔到邊忽似科技公司嘅經濟結構。
任Neumann喺公司行政方面權力再大，一直以嚟公司狂燒錢，董事局當然係金主話事。最大金主係軟銀孫正義嘅vision fund，後面最大嘅金主喺沙地資金。之前Uber上市，股價唔靚，令沙地資金變得謹慎，唔同意孫正義大手加碼揼錢落WeWork燒。WeWork冇咗大額注資，又唔捨得冇得繼續燒，於是搞上市，就引爆成件事。而家上市不成，銀行裏面嘅錢剩返唔夠幾個月用，惟有死死地氣面對現實，大換血搵人量入為出，唔等使嘅嘢，由業務到Neumann用公司錢買嘅私人飛機，賣得就賣，摺得就摺。錯就要認，認就要改，唔通等攬炒咩，係咪？
撰文：宋漢生
fb : sunghsblog