賭王何鴻燊四房孻仔何猷君日前榮升父親，佢嘅內地超模太太奚夢瑤為何家添丁，成為賭王首位男孫，囝囝跟族譜改名何廣燊，而英文名就由猷君取名Ronaldo。猷君連日留喺養和醫院照顧太太，噚日下午佢就以一身白tee短褲波鞋便服出現，接送探BB嘅朋友，之後換長褲出去食飯時接受傳媒訪問，全程展露燦爛笑容。
獎勵唔會輕手
猷君透露做爸爸嘅感覺奇妙，𠵱家已略為熟習湊小朋友，學識抱BB、掃風同換片，佢又透露兩母子好健康，問到BB出世日子同幾時出院，猷君話BB喺今個月22日出世，要等太太休養好再出院，而賭王已見過孫仔。問到賭王有冇讚？猷君笑住話：「都唔係讚我嘅，開心囉，呢啲係講機率。」太太為自己生咗個仔，猷君話一定會好好獎勵：「一定唔會輕手，都會係佢鍾意嘅嘢，但呢度就唔方便講。」
問到會唔會再生多幾個？猷君承認同太太都鍾意小朋友，會追多個：「阿媽實想，我都想嘅，都想何廣燊有細佬妹，我細個時候有好多兄弟姊妹好開心，我想有三個，唔知太太聽完會唔會唔開心，都好辛苦。」至於想追仔定女？佢話：「冇壓力，順其自然，如果係女就壓力少啲，係仔係女我都開心。」
撰文：馮仁昭