「或者呢行嘅人覺得吳岱融係一個人氣跌得好犀利嘅人，但我由人氣跌到好犀利慢慢上升，喺呢個過程裏面，我真係睇到好多嘢。」60歲的吳岱融，沒想過走到這把年紀，還有機會重登男一之位。
廿年經歷高山低谷，昔日是大台小生，之後跟無綫鬧翻不歡離場，繼而全裸拍三級片，再退到幕後，人氣不復再。低谷之時，稜角磨平的他，反而享受名利大跌帶來的自由生活：「因為凡事都有得失。」
睇得開，事隔廿年回巢，由昔日小生退落二線，欣然接受，今日在《牛下女高音》再嘗主角滋味，「大爆哥」的魅力，來自閱歷。
採訪：Sukey 攝錄：吳斯金 攝影：葉嘉穎
於80年代，吳岱融是大台當家小生，跟梁朝偉平起平坐，當年代表作有《絕代雙驕》的「花無缺」、《邊城浪子》及《原振俠》等。但93年，因為跟TVB鬧翻解約，亦進入他的低潮期。當時傳出鬧翻的版本，是吳岱融私自去亞視宣傳其處男唱片。
然而當事人稱，事件另有內情，只怪當年處理不善：「當時拍完《原振俠》無耐，我喺外邊接咗三套電影，點知公司話要開一套劇，我唔開名喇，總之係一套講述醫療嘅時裝劇，我擔演男主角，我本身幾鍾意，都希望接拍，於是我推咗嗰三套電影，連定金都退番俾人。點知轉個頭電視台突然通知我，唔知咩原因套劇唔拍喇，呢個就係導火線。」
離巢TVB――「對我嚟講都係好處，唔好一面倒永遠係男一，否則睇嘅嘢都會唔同。」
最後他接回三套電影，但這個時候，無綫另一監製向他招手，他一口拒絕，成為禍根。吳岱融說：「問題之處就係因為有人會覺得，A監製搵我就拍，我（B監製）嘅戲你就唔拍，我就係咁樣出咗事。早期嘅我有時候唔會妥協，因為太自我。」
「當然𠵱家睇番，只要當時我補番一個電話，就可能繼續留喺公司拍落去。不過人生好難解釋，每個階段都係隨心，今時今日嘅我當然識得咁樣做。故事就係咁樣，之後就有好多其他理由。整定嘅，好多嘢都冇得解釋，我亦覺得走係遲早問題……不過對我嚟講亦都係好處，唔好一面倒永遠都係男一，否則睇嘅嘢都會唔同，但當然外闖過程係艱苦。」
同大台脫鈎，同年他把心一橫，接了兩套三級片《滅門慘案之孽殺》，及《替天行道之殺兄》，後者更去到盡全裸露正面，而當時的對手，正是現任太太鍾淑慧。那些年外界對他拍三級片標籤為「求出路，為搵錢」，甚至行內人認為，吳岱融將自己推向死角。感到被誤解了26年，他今天要為自己平反。
三級男星――「我眼中唔係三級，我唔敢話自己演得好，但至少係做自己本份。」
「到今時今日，好多人仍然忽視咗我嘅態度，甚至有人話我梗係收咗好多錢，我可以話畀你聽係冇嘅！而且某啲演出方案係我提出，例如正面全裸係我提出。我睇過一啲好生活化嘅日本或者外國電影，兩公婆嗌交，佢真係冇着褲吹緊風筒，你就可以睇到生活化嘛，當時（小生全裸拍戲）我都差唔多算係第一個人咁做。
「我覺得演一隻狗就要似一隻狗，雖然嗰套係三級片，但我眼中唔係三級嘛，我係覺得嗰場戲有需要嘛！點解到𠵱家60歲，我演嘅戲仍然有人認同，我唔敢話自己演得好，但至少係做好自己本份，原因我對呢份工作嘅專注同尊重。套戲對手係我太太，即當時係我女朋友，佢畀劇本我睇，我睇完尊重佢決定，只要佢認為鍾意嘅就即管去做。好彩我都係一位演員，否則唔會有男人鍾意自己嘅女朋友咁樣做（拍三級片）。」
三級片後，他全線退出幕前，轉戰幕後，由小生變導演，經歷過風光不在。別人的眼光是最大考驗，艱難裏面，他無悔當初。「我冇諗過人氣跌咗會怎樣？後來人氣慢慢跌，好多人會喺我耳邊問，你𠵱家點樣呀？無論係觀眾、朋友、屋企人，我相信係善意嘅。只係在佢哋眼中，認為我本來埋親位都係主角，但我會用得失嘅角度去睇，例如好多好紅嘅藝員，佢哋真係要犧牲自己嘅私生活，例如結婚生子，去繼續事業。我有少少唔同，就係咩都唔理做咗先。」
「於是一停幕前就結婚，完全脫離幕前事業。當時我可以同兒子、老婆，我家人行吓公園，做好多嘢係當時好多好紅嘅朋友未必做得到嘅，至少我可以同家人好自由咁周圍去。」
面對低潮――「後來同太太返咗國內住，有架行得吓嘅車代步，我已經好開心！」
不過人生，無永遠的敵人，相隔22年，重返TVB，昔日這位大台小生，不在乎退落配角。他說：「好多失蹤螢光幕嘅人後來返嚟，效果都好好嘅，我又冇諗跟住要點嘅，人嘅嘢，最怕你心裏覺得所有嘢係理所當然，如果你覺得理所當然，你咪唔開心囉！成日問點解我唔係男主角呀？或者點解戲份唔重呀？人工點解咁少呀？成日咁諗就一定大鑊。所以回巢後我冇唔舒服，我又做過幕後又做過導演，好明白嗰啲製作人、投資者諗法，你冇人氣佢唔會搵你，呢個係好現實嘅遊戲。」
演員生涯最低點，是05年復出幕前，46歲的他由低再爬返起，首先學識放下身段，「演員好被動，人哋揀唔揀你，就視乎角色啱唔啱你，或你嘅人氣夠唔夠。於是我覺得無論咩人搵我都好，甚麼角色都好，一場戲都好，兩場戲都好，錢少到不得了都好，或者安排入住嘅酒店係幾咁不堪都好，我都做，好過坐喺度嘛！可能係我呢種心態，令我可以慢慢滲番入圈子，慢慢開始多人搵番我開工。
「曾幾何時我喺高峯時，算做好紅嘅時候，我喺香港有三、四架車，後來同太太返咗國內住，真心話，國內嘅生活費亦都平啲，嗰時我供一層千四呎嘅樓，都係3,000蚊。國內生活初期我冇車，到後來有架行得吓、但好差嘅車代步，但我已經好開心，人就係咁㗎啦！唔好太理所當然，因為所有嘢都唔係一定㗎！」
