最近雖然反送中抗爭冇之前咁密，但除咗逢周末繼續有行動外，唔少街坊同網民繼續喺各區修復連儂牆，但有民主派人士同八方講，好多街坊同佢講，近日多咗差人針對貼連儂牆嘅人，特別係學生同後生仔，而政府開始喺各區清緊不同連儂牆，佢估計應該同區選有關，建制唔想仲有人不斷提住佢哋撐送中。
該民主派人士同八方講，其實好多連儂牆貼嘅嘢，根本同區選冇直接關係，大部份唔係講五大訴求，就係反警暴、追究7.21同8.31事件，但以佢所知，建制派用盡方法要逼政府清晒啲連儂牆，仲有係嚴打任何人再貼嘢上去，講穿咗就係怕再有人記起建制派點樣撐送中、撐警察，所以要將反送中文宣喺社區撕得乾乾淨淨，民主派當然覺得好笑，話當日建制將撐送中、撐警察講到理直氣壯，又使乜怕人將佢哋嘅「好人好事」大大力宣揚出去呢？莫非佢哋覺得撐送中唔見得人？