年屆60歲的吳岱融，生離死別的經歷怎未嘗過。大台播放他的新劇《牛下女高音》，一班中佬與老校長的故事，拍攝時，主角吳岱融也正值經歷與老父的離別，此劇有切膚之痛的演出。
家道中落 酒廊唱歌幫補
「拍攝至後半段，爸爸身體開始好唔舒服，已經有心理準備，的確會唔開心，因為爸爸本身係一個好堅強嘅人，覺得佢係永遠唔會離開，小時候爸媽好愛錫我，媽媽亦都離世好多年，𠵱家輪到爸爸……當時好有趣，上天好似特登做一啲嘢嚟安慰我，因為拍攝《牛下》尾段時間，劇情係講述人生離別，咁啱有一首歌我唱嘅，叫《那邊見》，歌詞意思係叫人唔好唔開心，就算朋友、親人離世，可能都只係早走一步，遲啲就可以見番。
來自新加坡的吳岱融，兒時隨父母來港定居，父親開製衣廠，他是太子仔。直到十多歲，父親因製衣配額政策影響生意，四面楚歌下最後結業，家中經濟亦出現問題。藉貫潮州，見兩個妹妹仍在求學的他，正值新加坡當兵，晚上也做外快減輕家庭負擔，亦是踏上銀色旅途的伏線。「當時家庭環境出現咗變化，於是搵份侍應做，喺大酒樓托住餐盤，然後有燈光照住我哋，我嘅戲劇人生可能就係由嗰一刻開始，我記得當時表現好好，好快部長就搵我企最前第一個，之後亦有去酒廊唱歌。」他更於酒廊認識了伯樂梁立人，加入新加坡電視台訓練班，「我喺新加坡拍咗六部電視劇，都屬第一線，後來整傷腳，就返回香港，又係梁立人先生引薦，加入無綫，我拍《絕代雙驕》都係梁立人先生嘅作品，佢係我嘅大恩人。」