反送中運動爆發之後，唔少市民同網民發起買爆黃店嘅「懲罰」行動，好多黃店好似龍門冰室咁，門外大排長龍到生意做唔切，至於撐警撐送中嘅藍店呢？冇咗黃絲買爆「懲罰」、北京又關水喉冇埋自由行客，變相雙倍「懲罰」，自然苦不堪言！日前就有左報報道一間被指是藍店嘅餐廳冇生意，呼籲愛國愛港人士支持，新民黨葉劉淑儀第一時間響應，仲喺fb發埋文，點知俾懷疑係間餐廳嘅人叫佢刪文，點解有葉劉幫手宣傳都唔想要呢？
網民：感謝提供罷食名單
《文匯報》日前報道，西營盤有間叫加記嘅餐廳，因為向防暴警察送水，結果畀網民點名係藍店，生意大跌之餘，業主又唔肯減租，令老闆蝕咗80幾萬，再係咁實執笠。《文匯報》咁寫無非想叫藍絲去幫襯，葉劉噚日立即喺fb發文，話自己有日想「加餸」，於是特登去加記叫外賣，大讚出品好好，老闆娘又十分熱情。
有葉劉「認證」，照計吸引愛國愛港人士幫襯，點知成班網民留言，話「感謝提供罷食名單」、又話葉劉係「死亡之吻」，更問佢「做乜咁害人，有咩居心？」有疑似同加記老闆相熟嘅人留言，感謝葉劉「認證」，但就話「可否要求你刪除這帖？老闆話咁樣更加水洗都唔清，好快唔使做生意了。拜托（託）」，葉劉一見梗係火都嚟埋，發文反擊話有人用「裝修」 去「恐嚇」藍店同顧客，咁係咪恐怖主義手段？仲話打壓佢表達意見同光顧食肆嘅自由、違反法治同人權法喎！但成班網民即時寸佢，話冇人講過裝修，只係話罷食箒！唔通罷食都犯法？使唔使叫防暴拉罷食網民，或者去法庭申請禁制令禁罷食藍店？
李八方