吳岱融跟老婆鍾淑慧的婚姻，已經走過24個年頭。老夫老妻，越老越愛。前年他更找人編寫一首情歌《回去愛你十億秒》送給另一半。
兩人當年由情侶檔連拍兩套三級片，到一齊北上重新開始，婚姻之道包含甜酸苦辣，磨擦到磨合，吳岱融練成寵妻暖男。有指他的中港星馬物業，全寫太太名字。吳岱融說：「其實只係我唔想煩，我同太太無論發生咩嘢事都唔會分開，因為都好愛錫對方。講番層樓，我覺得呢件事一定唔會發生（分開），不過如果真係發生，我都會畀晒佢，寧願自己捱。佢跟咗我咁多年，我又咁錫佢，一定唔可以令佢過得唔舒服同辛苦。」
婚後之癢 唔否定亦唔承認
令到一個男人降服，只因這個女人願意同甘共苦。「佢對屋企都係全部付出。例如有段時間我好被動，完全冇工作，屋企開支全部靠佢，有港姐之名，工作的確會比較多，而佢將所有收入真係貢獻畀晒屋企。」
每個人的婚姻，都會出現不同程度之癢吧！他說：「年輕時會有好多狀況，好難解釋。男人同女人嘅構造真係唔同，女人嫁俾一個男人係一生一世，除非個男人對佢唔好。我就覺得大部份男人選擇結婚，都知道對方願意為自己犧牲一切，會盡自己所能去尊重同保護。而構造方面我唔多講喇，我唔否定亦都唔承認，但問題係最徹底嘅我，都係以佢為先。」