約韓君婷訪問，要待她放工後才可以進行，地點最好選在銅鑼灣，方便她一放工就行過來。她現在返十二放九，在銅鑼灣一家新開的美容中心上班，新卡片上印上的職位是「經理」。韓君婷說，即係乜都要做，要睇數見客管人，午飯時間還要趕去銀行入數……
娛樂圈生活？不穩陣。現在，「穩穩陣陣有一份人工，所有嘢都係由零開始（新公司）。我入到去由零set up，凳呀枱呀唔使我買，但係盤數有乜要使、有乜要慳都要注意囉！」
97年當選亞姐再過檔無綫，韓君婷期間經歷可說大起大落，起碼在體形上也如是，由暴肥「籮霸」到厭食「火柴人」，嘗盡極端人生滋味。近十年才逐步找回規律節奏，去年卻遇上喪母之痛。
44歲的韓君婷說，有人用「坎坷」來形容她，「就算我人生有咁多高低都好啦，我都過到，我有乜嘢經歷唔到啫，我就係一隻曱甴囉，你打我唔死㗎！」
比較現實是，現在要做「灰姑娘」十二點前回家，明天早起要返工嘛！
撰文：文嘉龍
攝影：沈健程
寧願死唔好病
新工剛剛返了三個月，這個醫療集團，有美容有醫美又有中醫，每天韓君婷都要坐鎮公司處理大小事務，「點解我會轉呢份工，係因為有個前輩知道我想自己開一檔做美容，佢話呢個時勢唔係咁好，不如你跟我哋一齊做，穩穩陣陣你又有一份人工，佢哋又係新開，所有嘢都係由零開始囉！」
今年初才聽說韓君婷想重返娛樂圈，她說當然不抗拒，只是一直沒有主動敲門「頴撈」而已，「你知返工呢，係一件好綁手綁腳嘅事，以前拍劇嘅時候，又出去登吓台，咁我有一嚿錢可以last到去做第二樣嘢，但係𠵱家我打份工，變咗我要確保handle到自己份工嘅時間先啦！我以前朝九晚六，𠵱家就係十二至九，已經佔據咗我日頭嘅時間，唔通淨係搵套拍夜晚嘅戲畀你？我有諗過反而會唔會去電台會好呢，可能開一個朝頭早喺商台，求吓你畀個節目我玩吓吖，朝頭早做八點至十點，我就覺得啱啱好囉，八點做到十點，食個早餐十二點我又可以返工。」
她說的「以前返朝九晚六」，是指之前在一間德國藥廠做marketing時的工作，正正式式一個OL，她說六點鐘放工後，回到家仍然要趕工做PowerPoint。只是為了照顧病母，她索性辭去藥廠一職，全天候照顧母親。
「媽咪醫藥費都真係唔平，呢啲都係比較大嘅開支，中國人都有句說話『寧願死唔好病』，但係錢銀對我嚟講係其次，如果使到嘅錢能夠可以讓媽咪舒服啲，我會孭咗佢囉！我覺得唔單止係我，我相信好多𠵱家嘅香港人都努力緊，如果佢屋企人病緊，佢哋都會用晒所有辦法，使晒所有嘅錢去令到屋企嘅病人舒服啲囉！媽咪病嘅時候，我冇諗過要慳，我寧願自己食少啲，我唔買嘢，就算我要使晒份人工落去佢度，我都覺得係值得！」
好難有男人好似佢咁好
韓君婷8歲已知道母親有甲狀腺問題，到了晚年就被肺癌折磨；2010年韓君婷因抑鬱症和厭食症困擾而退出娛樂圈，返回娘家新加坡生活，直至2014年回流香港打算復出，其母亦跟隨她回港，至去年6月病逝。母親最後的歲月，韓君婷一直陪伴在側。
韓君婷說：「𠵱家仲係好掛住佢，我諗好難可以唔掛住佢囉，我同媽咪嘅關係，除咗母女，都係一個好好嘅朋友，大家好依賴大家，因為爹哋成日出國做嘢，媽咪喺我8歲嘅時候已經知道佢有甲狀腺問題，所以我好細個已經成日陪媽咪去睇醫生。」
母親最遺憾的，是未能看見韓君婷結婚和生小孩。「媽咪最病嘅時候係由新加坡啱啱返嚟，我覺得無謂再將佢搬嚟搬去，媽咪最錫我亦都最依賴我，有好多嘢我最清楚，你將佢搬返去新加坡，哥哥同啲阿嫂就會呢樣又點呀嗰樣又點。佢返到嚟香港，有我大哥啦，有佢兩個小朋友啦，又有我啦，同埋仲有我阿嫂嗰邊嘅屋企人，佢哋喺沙頭角好大家族，我阿哥阿嫂同我啲姪仔姪女不嬲喺香港，係香港嘅家人，新加坡仲有兩個阿哥（四哥、五哥），上海有一個阿哥，佢哋個個結晒婚有小朋友，我有十個姪仔姪女，我諗媽咪其實都覺得幾安慰有咁多孫，唯一遺憾就係見唔到我結婚同生小朋友囉！」
曾經一度，韓君婷是有機會結婚的。97年選亞姐時認識身為大會髮型師的葉錦昌（Sherman），相識三個月已經認定終生，拍拖兩年後Sherman向她求婚的同期，不幸發現患上肝癌，一年後不敵癌魔病逝。
「我諗好難有一個男人會好似佢咁好，佢直頭係一個天跌落嚟嘅天使。佢係一個好明白事理嘅人，因為佢大我十二年，所以佢比我成熟好多，始終佢做髮型師見過咁多人，佢好識得處理我哋嘅感情令到好穩定……冇辦法啦，不幸佢過世，幸福嘅就係我知道愛情係點樣，一個啱嘅對象應該係乜嘢感覺，所以我以後去搵老公，我就會去諗番呢一種感覺出嚟！」
除了與Sherman的一段情，另一段就是她和Joanne陳早茵（陳欣健女兒）的同性之情，韓君婷說遇上Joanne，是緣份。「我唔抗拒，我唔覺得同性戀係一個問題，愛情不限於男同女，你要愛一個人就愛一個人㗎啦，只不過睇吓會唔會踏入去一個性取向，或者一個性行為啫！我同Joanne拍拖嘅時候，啱啱好就係我又冇拍拖，我哋兩個好合拍好多嘢講，一齊好開心。我當其時嘅工作都靜下來少少，我有多啲時間陪佢，因為佢需要俾人照顧同陪嘅時間比較多，which is我發覺好多偏男仔性格嘅女仔，都會需要多啲女性去關心佢哋。佢去打牌又會幫佢去處理呀，唔夠錢呀，呢度有呀，如果你冇人接呀，OK，咁我就去接埋你；咁當然佢都好sweet，佢都會同我傾，呢隻手袋好靚呀，嗰隻錶𠵱家啲fashion應該要帶啲乜嘢，大家好似女仔嘅partnership，只不過我哋超越咗變咗情侶嘅partnership囉，只不過係唔work out囉！」
與Joanne的短暫情緣只維持了九個月，06年分手。「其實佢結識咗另一個女朋友啦，嗰個女仔亦都明目張膽地同我講『我贏咗你㗎喇』，佢亦都喺Joanne面前講，咁Joanne冇反駁過呢樣嘢。我後尾都有同Joanne解釋得好清楚，我話既然你喺出面都有另一個女朋友，而嗰個女仔亦都好鍾意你，咁我希望你唔好再嚟煩我喇，因為你真係好滋擾我嘅日常生活，我話分咗手就係分咗手，我都唔怪有任何嘅第三者，我覺得其實有就有，大家命中注定，我需要move on去第二樣嘢，佢move on去第二樣嘢囉！」
我就係一隻曱甴囉
事隔多年，她說沒有恨Joanne，但不會再聯絡了。如果遇到另一同性再追求，會再接受嗎？「唔會，我諗嗰陣個好奇已經滿足咗我，我亦都搵到答案，我鍾意男人多啲囉！其實真係多謝Joanne畀我知道，因為Sherman過咗身之後，我有懷疑我會唔會以後就唔會結婚，我又諗其實人生裏面有一個great love，一個真正嘅愛情，已經係好好彩；Joanne之後，我有另一個見解，我自己比較鍾意男性，原來我心入面仍然盼望會遇到一個男人，可以接受我嘅所有。」
自稱單身近十年的韓君婷，2010年因為抑鬱症和厭食症而決定返回新加坡娘家重新生活。她說，在新加坡的日子，令她生活重回正軌。「嗰時我幫我四哥打工（環保回收公司），我四哥好惡㗎，因為佢話明公司我唔會理㗎，所以你要睇實啲呀，如果蝕咗盤生意係你蝕咗盤生意，我要瞓街、我啲小朋友要瞓街，係因為你囉！我每年有二十二日假期，二十二日我都唔能夠用落自己嗰度，要分批攞去同媽咪睇醫生，其實由嗰陣時開始已經唔能夠再放肆，同埋真係要長大，真係要有責任心囉！」
在新加坡，家中總會聽見有人大喊「姑姐姑姐」的聲音，「我嗰一刻有8個姪仔姪女，有四個喺新加坡、有四個喺海外啦，有四個特別黐我唔知點解，有兩個特別細，一個九個月大、一個歲半，有時我阿哥同阿嫂要出街拍吓拖，佢哋就隊晒啲小朋友畀我，嗰陣時列明有乜大時大節就係姑姐煮飯，媽咪睇醫生就係姑姐搞，大時大節嗰餐飯就係姑姐搞，好似乜都關我事咁囉，佢哋覺得姑姐嚟接放學好開心，所以話我冇結婚，但係其實我都好似一個媽咪嘅生活囉，呢一啲習慣全部都喺新加坡養成嘅！」
當年在香港爛蒲爛飲的韓君婷，近十年連酒也戒了。「呢十年生活規律都係好好，我又早瞓，我有八年亦都戒過酒，戒咗你會覺得身體好好多，但係之後你飲番一杯，你就會好wing囉！兩杯就停喇，我成日都有個藉口，唔得呀，我要趕火車返屋企呀，如果唔係搭的士好貴㗎，所以我12點就要走！」
愛別人之前，先學識愛自己，「我諗所有嘢都係有原因去發生嘅，原來抑鬱症我屋企係有遺傳㗎，所以呢個冇辦法啦，後尾係我去睇醫生，醫生先至話原來係咁，我先至aware到我媽咪有可能會咁樣，我覺得每一樣嘢發生都冇辦法，我冇後悔過任何一樣嘢，反而我覺得幸運，我諗一般人佢哋會用坎坷呢個字去形容我呢個生命，就算我人生有咁多高低都好啦，我咁都過到咯，我有乜經歷唔到啫，我就係一隻曱甴囉，你打我唔死㗎！」
【後記】有「揸拿」
雖然收了工還要接受訪問，但韓君婷依然精神十足。問她看回以往「火柴人」時期的照片，有何感想？
「好醜樣呀！我𠵱家好深信要有返肉哋，我𠵱家就係鍾意自己有多啲肉哋，唔緊要啦，女人要有啲嘢『揸拿』，就係個身形要有啲『揸拿』，因為講真我都唔想攬住個骨杉杉嘅男人，咁我都希望我嘅男人攬住我嘅時候，佢都會有一種溫暖嘅感覺，有一種安全感囉！」
場地提供：銅鑼灣迷你酒店