「男人不壞，女人不愛」原來在演藝圈中真的會發生，好似之前「花心仔」一腳踏多船，仲搞到有金錢瓜葛，朋友割席，仲差點連累多年好友，不過冤豬頭都有盟鼻菩薩，仍然有女仔鍾意佢，希望花心仔真係會重新做人。
有指花心仔因為桃色風波，搞到要問好友借錢解決，其實佢借錢度日呢個習慣，已經唔係一時三刻，過往咁多年來，斷斷續續問兄弟、朋友借錢，計計埋埋已有七位數字，好兄弟個人向來耳仔軟，知道一借無回頭都盡力幫花心仔，但係佢嘅身邊朋友，就勸佢唔好再借錢幫花心仔。
自從花心仔見好兄弟真係斷水喉，就獻計要對方介紹一班城中富二代千金畀自己，希望可以用口才追掂一班愛追星嘅有錢女，好兄弟當然唔想影響身邊班有錢朋友，所以就拒絕花心仔要求。但花心仔一直未死心，就自己去facebook、Instagram主動add一班富家女，留言話想同佢哋做朋友，呢班千金小姐都唔係儍更更，知道佢嘅來意，同埋坊間都聽過佢唔少臭史，當然唔會回覆，同花心仔保持距離。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。