林鄭月娥出席日本天皇登基典禮玩電話，特首辦就狡辯儀式冇唔准帶電話入場，回應小學雞，除咗俾網民負評唔識尊重，仲「成功」揚醜國際，日本當地電視台事後翻炒呢單風波，仲撈埋777就快被換走嚟講，點知仲有餘波。《日本產經新聞》引述外務省，話原來冇正式邀請777同澳門特首崔世安，佢兩位唔通玩白撞？
唔好話八方馬後炮，其實當日睇住777坐位喺門口附近，已經有諗到呢個問題，特首辦就得一句回應，話777係「應日本政府邀請出席」，但究竟係咩形式邀請先？
吸嬲力驚人
外務省之後再幫口澄清，解釋原則上，日方會邀請佢哋承認嘅國家、歐盟同聯合國，至於其他出席者，就按對方意願再以「以個別形式」發邀請，而香港、澳門同台灣都屬呢種，層次擺明差一級。
而呢場風波仲再次反映777嘅吸嬲力真係無遠弗屆，事關fb有個同日本雅子皇后同名但相信係非官方嘅專頁，上載咗多張典禮相，惟獨777嗰張引來幾萬人畀嬲，仲集體留言話「Shame on林鄭月娥」，大家又眾志成城幫手加標籤，包括黑警老母、香港之恥、殺人犯等外號tag滿777成身，名副其實人見人憎。
李八方