經過逆權之夏，唔少香港人被暴政所傷身心受創，但當權者同班建制派貫徹原則，唔解決問題，只想去解決提出問題嘅人，然後日日將止暴制亂掛喺口邊，再拋啲屎橋想令香港扮回復正常。好似身兼行會成員嘅葉劉，尋日就喺立法會度叫政府「諗啲噱頭」幫市民治療創傷，提議啲名店、商場一齊大減價喎。
其實呢排政府先啱啱又倒香港人血汗錢落海，拎過百億搞紓困措施，但都係明益零售、餐飲、物流旅遊業，葉劉就覺得呢啲「擠牙膏」措施冇咩幫助，正當八方天真地以為葉劉想用物質收買香港人，令大家化傷心為購物慾，但原來佢只係希望呢招可以吸引旅客嚟香港消費，乜旅客開心，香港人就獲得療傷？呢個係乜嘢神邏輯？最後，八方要提一提葉劉，佢撐完送中又撐警，香港人經歷呢場浩劫，佢絕對有份一手做成，唔使旨意扮唔關自己事。