近日積極參與逆權運動嘅阮民安（Tommy），表示為咗紓緩大家緊張情緒，也為抗爭手足打氣，不時搞快閃到各區唱歌。之前佢更宣佈舉行演唱會，獲唔少網民支持，不過前晚佢喺fb寫咗篇文，話先後申請伊館同旺角麥花臣，都被拒絕，佢質疑係有人刻意唔批檔期。
為港人打氣
不過，有「樂壇小強」之稱嘅Tommy，明言會再找合適場地開騷，如果最後開唔成，就去手足屋企門口唱。
Tommy噚日回覆《蘋果》話：「團隊一公佈話開騷，反應好好，9月中搵到伊館，有期就即刻申請，點知最後覆我哋話要內部緊急裝修，畀唔到個場。我哋咁需要場就唔批，有內部同事話，𠵱家啲場地對我可能會有政治考慮。但無論有冇政治打壓，我哋想做音樂，同埋我哋要搞個屬於自己香港人打氣騷嘅決心係唔會減退，𠵱家我哋團隊好努力咁同唔同場地接洽，一有消息會同大家講。」
Tommy最初公佈開演唱會詳情時，因為冇主辦公司，佢用眾籌方式預先收訂票錢，𠵱家開騷日子決定唔到，幾時會安排退款呢？Tommy話：「我哋睇埋呢兩個星期，如果真係都冇場先再搞退飛，𠵱家完全冇人有呢個要求，如果有人要求，我哋會即退，自由選擇。」
Tommy指形勢有啲複雜，怕一退款就預計唔到參與人數去搵場地：「如果中途有人要求退就即退，冇就繼續去，但一定會keep住update所有人！」
撰文：馮仁昭
