隨住零售飲食業步入低潮，預期有許多酒樓食肆在不久的將來就要面臨結業的危機。然而，有人辭官歸故里，有人漏夜趕科場。美國漢堡包專門店FIVE GUYS自去年殺入灣仔開了東南亞第一間舖，今年又進駐全新K11 Musea商場，更在中環萬年大廈HMV舊址，以2016年同價的一百萬月租，租下近一萬呎的樓面，一年之內在香港連開三舖。如果沒有反修例事件，以平租開大舖好正常，但如今咁嘅市道，仲喺中環、尖沙嘴開咁大間舖，的確有些逆向思維及反其道而行。
到底這間來自美國華盛頓的連鎖快餐店，見到香港市場的機遇在哪裏呢？
FIVE GUYS的特色出名係漢堡包可以無限添加配料、薯條用花生油油炸，仲有免費花生任食。如果要跟麥記、Burger King、KFC分一杯羹，產品差異化似乎不夠大，再加上分店唔夠多，品牌知名度又唔夠高，這個戰場不見得有任何贏面。
近年香港消費者越嚟越講求健康、多菜、少油、少鹽、少肉，市場自然爆出了Green Common，The Joomak、Impossible Burger，甚至連不太健康的大牌快餐店也相繼推出綠色Menu去回應這個需求。但你睇FIVE GUYS的餐單主打漢堡、熱狗和薯條，就係要跟這個趨勢背道而馳，其市場策略，的確耐人尋味。
Anyway，又啱啱遇着剛剛，機會仍是有的。這一邊廂，你睇吉野家及美心集團旗下的餐廳，最近全部都受到抵制及破壞，如此一來，FIVE GUYS大可以撈返一些散客，未嘗唔係有所得益。另一邊廂，市道唔好兼社會動盪，市民心情越差，可能就越要放縱自己，吃一些不健康、重口味、壞壞哋嘅嘢，FIVE GUYS正正就係好多人心中的Guilty pleasure。咁樣諗，FIVE GUYS的生意，好有可能反會跑贏大市。
文迪晞
mailto:[email protected]