「天資係上天畀小朋友嘅禮物，如果大人冇營造環境加強呢方面才能，所有嘢都係徒然！」80後視藝導師「梵高爸爸」坦言，大仔未出世前，已想為他安排天賦基因測試，更不斷搜尋相關資訊，「想知佢有冇遺傳咗我嘅藝術細胞！」
梵高爸爸認為兒子越大越受外在環境影響，所以在兒子六個月大時進行了基因測試，結果出乎其意料，兒子藝術天賦只得中等分數，反而數學和演講能力較高分，最驚喜的是兒子智商較一般小朋友高，「我哋收入唔多要睇餸食飯，所以都會撥多啲budget（開支）去培養高分嘅天賦」。
他隨後火速為兒子設計一系列培訓課程，包括安排兒子兩歲時開始學英語、普通話，藝術方面，由於兒子對顏色的感知能力只屬平均，故他會繼續觀察，暫時會以興趣班形式讓兒子學習，「會揀一啲有藝術、音樂嘅playgroup，唔會扼殺佢」。對於檢測結果是否滿意，梵高爸爸直言兒子年紀尚幼，未知結果是否準確，但認為可作為參考。
有人存疑 較重敏感測試
天賦基因檢測近年大行其道，不少港爸港媽都是支持者，但亦有不少家長對檢測存疑，育有兩歲女兒的李先生認為：「好多嘢受制於成長環境，天賦係有，但係咪咁容易喺DNA反映到？」他反而較着重女兒健康，希望透過測試檢驗出女兒是否有敏感基因，「我本人十幾歲時食某一種退燒藥會出疹，先知對此過敏，所以測試敏感基因會有用啲」。
黃小姐半年前為當時年僅三歲半的女兒進行測試，結果顯示她在體育和音樂方面較好，「都OK準，因為佢一歲半時已經識攞住有顏色嘅LEGO，講red、green、blue，可見佢對顏色特別敏感」。她直言會因應報告結果，給女兒在體育和音樂方面多一點發展，「如果報告話佢唔好嘅項目，就加多留意，加多幾錢肉緊培訓佢，唔會扼殺佢！」
育有三歲囡囡的陳小姐，去年花約4,000多元為女兒做基因測試，包括IQ、EQ、顏色、專注力等，結果顯示多項天賦高於水平，唯獨顏色認知只屬一般水平。她認為報告對育兒有幫助，「例如知道學術定運動方面好啲，就培訓多啲，行少啲冤枉路！」