鄧萃雯2009年因演出劇集《巾幗梟雄》而攀上事業高峯，雖然得到不少觀眾的歡心，卻因拍攝期間在片場非常霸道凡事都管，得罪了很多人，更有傳她與同劇的商天娥不和。
溝通好重要
鄧萃雯和商天娥日前結伴在牛頭角出席「幸福傳聲基金會」分享會，娥姐坦言從小到大都不擅辭令，甚少與人溝通，容易令人誤會，當年拍劇更因為同時要照顧患病的爸爸，身心相當疲累，她說：「嗰陣我以為做好本份就夠，點知有一次同公司傾續約，佢哋話『娥，我都唔明點解連幕後人都話你有問題！』呢句說話搞到我個心好難過，我決定唔再續約，日日都喺屋企喊，不斷問自己點解會係咁！後期再諗番，原來我好多時候都冇同人溝通，更加唔同拍檔講私事，但其實人同人溝通係好重要。」
經過這件事後，娥姐坦言懂得珍惜真友情，席間更主動邀請雯女上台話當年，提到當年拍攝劇集《巾幗》的不和事，娥姐說：「嗰陣人哋講是非，我有陣時都會搭嘴，無論之前講過乜都好，我今次第一次分享都係因為你至做。」接着娥姐更吻了雯女一下，一吻泯恩仇，場面感動。
學識要放手
雯女其後透露2013年拍攝《金枝慾孽貳》時因為沒劇本，壓力令她情緒出現問題，她說：「一度嚴重到可能要結束演員生涯，嗰陣我曾經憤怒、好挫敗，覺得人生又再次跌入谷底。經過兩年時間嘅沉澱，喺唔刻意安排任何工作畀自己嘅情況下，發現原來我係唔再緊張有冇工作、唔再諗住要努力賺錢，學識放手，唔再憂慮身外之物，畀自己體驗人生，竟然第一次真正感受到自己好幸福！」
撰文：翁可人