立法會內務委員會之前開會，未能選出新一年度主席同副主席，影響到噚日立法會大會竟然要加設「放飯時間」，有民主派質疑破天荒安排，查實係力阻「一男子」登上主席台。
過去若然立會主席梁君彥喺周三大會主持會議期間去食飯、去廁所、去休息，都會由內會主席、即係民建聯李慧琼暫代主席職務，但由於𠵱家未能選出內會主席，換言之冇代主席啦，立會噚日分別安排咗小休同午膳時間，等梁君彥可以喺冗長會議之間「唞一下」。
不過有民主派質疑，秘書處其實可以安排由最資深議員、民主黨涂謹申主持會議喎，質疑特別安排午休，根本係唔想畀涂謹申有得做一陣立法會揸fit人啫。秘書處就解釋，由於內會至今未選出今個會期嘅正副主席，喺內會未完成選舉之前，梁君彥會全程主持今個星期嘅立法會會議；鑑於立法會會議時間較長，所以安排小休同午膳時間；而喺今日立法會續會，秘書處同樣安排咗午膳時間，亦喺上晝同下晝分別安排咗小休。睇番過往安排，秘書處只會喺拉布期間安排休息時間，今次例會都要搞午休，可算破天荒喇。