古天樂、宣萱、姜皓文（黑仔）、張繼聰同顏卓靈主演電影《犯罪現場》前晚喺九龍灣舉行首映禮，蔡潔、吳浩康、薛凱琪同吳肇軒等都有出席。大前日生日嘅古仔、同後日生日嘅黑仔獲大會送上蛋糕慶祝。其間場外有個內地女士不停大嗌，聲稱自己係「古天樂老婆」，又想衝入會場，最後被保安截停，不過台上嘅古仔未有太大反應。
正日陪家人
踏入49歲嘅古仔，透露每年願望都係身體健康：「有健康先至可以做任何嘢，有同朋友食飯，正日生日同家人慶祝，因為擔心交通，今年冇同fans慶祝。」宣萱話有送禮物畀古仔：「會記得朋友每年生日，因為會寫喺記事簿，朋友生日就會短訊祝賀。」古仔亦話記得宣萱生日，不過對方笑住話：「遲咗一日，會記一世，不過佢見到面先至講。」佢哋希望再合作，古仔想宣萱演反派，不過宣萱就想演自閉症醫生。
26號就踏入53歲嘅黑仔，佢話今日係老婆生日，聽日就係佢哋結婚20周年：「叫咗太太自己揀禮物，反正所有錢都交畀佢。每年會同太太旅行，但今年要開工。」
而張繼聰就大談槍戰戲：「張家輝、古天樂同劉青雲揸槍好有型，但自己就揸到『瞓厲頸』咁。我返屋企會將傷勢誇大十倍，博老婆關心同個仔慰問。」
撰文：馮仁昭