楊穎（Angelababy）有份參與內地真人騷節目《奇遇人生2》，之前去咗加拿大拍攝踩單車旅行過程，前日播出預告花絮，Baby自爆好唔甘心外界只係覺得老公黃曉明對佢好，再冇其他。
無奈苦笑
喺預告中，Baby同節目拍檔喺間餐廳食飯，被華人老闆娘認出，驚喜問：「你是楊穎？」跟住有人問老闆娘對Baby嘅印象，老闆娘直接就話：「就是她老公很愛她這樣，但是現在有一些緋聞，我不知道是真是假。」Baby聽到之後，個樣有啲無奈咁笑咗笑，不過好快就變番正常樣，繼續食飯。但之後佢就講到覺得自己嘅演藝事業表現唔夠突出，最大夢想係有部作品可以畀大家記住：「我覺得我沒把自己這一方面做得很好，讓別人知道我就覺得甚麼老公對我很好之類的。當然不會甘心，只被大家記得這些。」
最後，Baby分享自己嘅愛情觀，認為兩個人喺埋一齊就好似兩塊拼圖咁，能夠拼埋一齊就係啱，不論男愛女定女愛男多啲，付出嘅關心同寵愛都係對等嘅。其實，Baby同黃曉明結婚四年，喺2017年仲生咗兒子「小海綿」，不過近日網上不時有人列舉唔少「證據」，話佢哋嘅感情似係出咗問題，仲不斷傳出婚變嘅傳聞。
撰文：馮仁昭