特首林鄭月娥用緊急法立蒙面法，條法例立咗之後，記者會又開咗、傳媒報道晒、市民街又上咗、仲有蒙面示威者拉埋，相信人人都知。但奇就奇在，有人仲懵到以為蒙面法未生效，呢個仲要係建制第一大黨民建聯立法會議員！
問泛民「係咪驚立得成」遭恥笑
由於蒙面法係先訂立後審議，立法會《禁止蒙面規例》小組委員會噚日終於開會，點知民建聯梁志祥唔知法例已生效，仲話規例須於12月4日完成立法，否則自動生效。佢咁講完成班民主派議員梗係譁然，但梁仲唔知自己衰乜，大大聲反駁：「你哋做乜嘢呀？我知就唔會問啦！……我問你哋都可以反應咁大嘅，乜事呀，係咪真係驚立得成呀？」其他人梗係恥笑佢，小組委員會主席黃定光即時為梁解圍話：「梁議員唔知，我哋會話畀佢知。」
公民黨陳淑莊忍唔住寸佢，話有啲議員唔做功課，居然連條例生咗效都唔知，簡直係奇蹟！又叫梁睇立會相關簡報，入面寫明規例10月4日刊登憲報，同月5日生效，「今日22號喇，阿哥，生咗效喇，10幾日喇，醒未呀？」咁梁志祥知自己衰咗，梗唔出聲！