聽完當差嘅朋友洩晒氣係咁埋怨，我都支持佢罷工、甚至整個警隊都齊齊罷工；起碼黃絲會冇咁憎恨佢哋，反正藍絲繼續不慍不火地沉默。下面說話有出處，絕非生安白造。
唔理巿民鬧定撐，我哋都係做好份工啫。至難頂，莫過於警隊同特區兩個老頂唔知玩緊咩嘢牌，巿民嘅聲音根本就係一面鏡。
由六月開始，全體巿民一面倒將特區老頂鬧個狗血淋頭，稍後黃、藍漸分；黃民將特首日日鬧爆，藍民沉默。經歷幾次特首發言比一般的士司機的水平都比不上、街頭阿嬸發言更有見地，似乎有點開竅，尤其同袍被鏹水嚴重燒傷，被打爆頭，特首冇咩慰問、警隊一哥一樣冇打氣；你估班兄弟真係咁冇腦、咁冇想法、儍嘅咩？
嚟到十月，叫特首下台嘅聲音喺黃絲陣營開始稍減，反而一貫默默守護嘅藍絲開始按捺不住，私信開始鬧林鄭兩頭蛇，懷疑佢先至係真正嘅黃絲頭子，幕後間諜。
一睇就明；老頂趕住退休，特首根本係黃營首領，四個幾月係咁將警隊擺上枱折磨，人都癲啦，我哋都係人，一樣有情緒，巿民鬧爆，屋企上下、連我老母都撐學生、撐年輕人、撐巿民，我哋豬八戒兩邊不是人！
班同事點會感覺唔到林鄭個心係乜嘢色啫？睇番呢幾個月愈嚟愈黃、漸見退縮嘅發言，路人皆知啦。
6月15日：警員的執法是理所當然，天經地義，不應抹黑他們的工作，他們克制、負責任、不是隨便執法。
9月24日：我對香港警隊的支持，源於警隊是香港執法機關。這不代表我會縱容警隊違規，或錯誤的做法。
10月19日：我支持警隊這機構嚴正執法，不等於我盲撐每一位警員，每一個行動。特區政府不會容忍任何違法和暴力行為，包括警隊。
挑……咁嘅老頂唔要就罷啦，簡直時代垃圾；警隊打生打死，被罵為黑警，禍不及妻兒竟然被咒黑警死全家。來到呢嗰田地，不如糾眾罷工同全體巿民一齊上街玩餐大龍鳳，幫自己洗底好過！