日本天皇德仁噚日中午舉行登基大典，典禮端莊隆重，唔少海內外政要都有現身觀禮。雖然香港特首林鄭月娥都有份獲邀出席，但網民之後就發起聯署，要求日方撤回邀請，認為畀777參加，隨時影衰令和時代嘅輝煌開端，結果有近7.5萬人響應。但最終777都厚顏現身，點知當賓客正襟危坐等儀式開始時，有直播就影到777低頭喺度「玩電話」，呢一幕仲俾網民cap圖瘋傳，就係咁，香港又多一單醜事「揚威國際」，隨時令香港負評又加一分。
特首辦：有人穿鑿附會
日本係禮儀大國，日皇登基但777就玩手機，隨時可以變外交風波，所以特首辦噚日亦火速澄清補鑊，解釋當時儀式未開始，又話典禮容許嘉賓帶同電話，仲話有人單憑截圖穿鑿附會批評特首喎。
八方睇番當時直播影片，由於777唔似外國政要攜眷出席，所以有段時間佢孤伶伶咁呆坐，仲一度被鏡頭影到皺晒眉、貌似不耐煩。而公道講，確係有其他嘉賓拎電話出來用，但通常快手用完就收埋，雖然係咁，唔代表冇問題，因為世上有一種態度叫尊重，不過呢樣嘢，同承認自己做錯一樣，都應該係成個特區政府同777永遠唔識同唔會做嘅事囉！
李八方