特首林鄭月娥上個禮拜發表咗佢任內第三份施政報告，封面繼續用返天藍色。根據佢嘅講法，就話係因為希望香港雨過天青可以重新出發，但呢隻藍色唔少香港人見到就驚同反感，因為同撐警藍絲團體，又或者斬抗爭者刀手着嘅嗰件藍色T-shirt毫無違和感，令大家以為特首同呢啲不法暴力分子「we connect」。
當大家以為777想用呢個施政報告封面向藍絲示好，但原來仲有伏筆，事緣前日武裝部隊香港警察喺彌敦道驅散和平上街市民，用佢哋嘅無差別慣技、出動水炮車亂射藍色水，唔少前線攝記俾警察射到變晒藍精靈嘅同時，仲影到一片又一片藍。網民拎嚟同777份施政報告封面一對，先發現原來顏色係最perfect match呀，原來叫水炮藍先真！又係嘅，用藍絲力量又好，用警察暴力也好，總之趕走晒反對聲，一定係777認為嘅雨過天青時囉。