現年41歲嘅黃祥興噚日喺Ig貼出斷鎖骨X光片，留言：「想問大家，斷咗鎖骨，應該做手術？定係等佢慢慢康復？」黃翠如、陳敏之同陳山聰都留言祝佢早日康復。
擔心大肚妻
黃祥興回覆傳媒時話：「鎖骨斷咗呀！噚晚返屋企時，因為停車場斜斜哋，我又急住返屋企，唔小心仆親，𠵱家喺醫院，準備聽日做手術，都有考慮過做唔做好，或者睇跌打，但自己好鍾意做運動，好鍾意舉啞鈴，覺得徹底性手術會好啲，將來確保99%骨會還原，睇中醫可能要一、兩個月先康復，郁動唔係咁方便，我要照顧小朋友，太太又大肚，𠵱家最擔心佢要送小朋友返學，所以決定做手術。」
雖然斷骨，但黃祥興仲識自嘲：「估唔到跌一跌咁容易斷，可能要飲番啲奶，我少飲奶，年紀又唔係十八廿二，要錫住身體，食番啲保健嘢。」問有否嚇親家人？佢話：「噚晚太太都喺度，我跌低後起番身，覺得膊頭位置有啲唔舒服，就試下自己chok，可能chok傷自己，因為越嚟越痛，之後去醫院睇急症，醫生要我即刻入院，聽日準備做手術。」又話好彩未有工作，希望下個禮拜可以好返。
撰文：馮仁昭