聶官買樓，三隻耳仔兩個口，當然係事先收晒風，聽晒慈母牙斬斬指點，yes mum。
睇住慈母近身侍衛入市，跑贏其他炒家，自己卻只能以喊外賣口號式高呼，叫大灣區開恩，畀個團購價佢，等退休後可以做肇慶城業主那位阿叻死黨，能不酸到爆……粗嗎？「班高官與42樓那批冷氣高層一樣，又唔做嘢，又唔讀書，淨係去美國攞綠卡，正一死仆街，還益佢地攞按揭着數買豪宅，還有天理嘅？」林主席匿埋喺新屋嶺，一邊打曱甴一邊呢喃，喔放心，冇CCTV錄到嘅，也許可以排期，幫佢做CCTVB獨家專訪。第二個選項，係叫聖公會大管家勸佢自首，洗心革面，信耶穌後，專心炒樓，唔再幻聽，成日諗住實彈射頭。
聶官入市，炒熱深水埗樓價，幫慈母老細洗脫攬炒之母的污名。對後市超有信心，無懼催淚彈放題，真金白銀撐住樓市的，聽講還有麥姓風水師，豪花四千萬買北角樓，與福建幫為鄰。兩單買樓新聞令炒家振奮，未曾止暴制亂已經有賺，緊急法下，地產佬唔驚再被摘瓜，釋懷！