【黑鏡線索】
上次講到，連坦克轆人都出埋，當年香港，主流都仲係接受所謂嘅「民主回歸」。集體誤判其中一個原因，係中咗大中華膠毒。中咗毒，就好容易俾人情感綁架，失去理智。
個情感綁架，點樣操作？
放大「共通點」 縮小價值觀差距
首先，對方會放大同你嘅共通點。例如，黑眼珠黑頭髮黃皮膚；例如語言。其實呢啲共通點，係咪咁共通？睇真啲你個樣同北方人又係咪咁似？你講母語港式廣東話，四川人聽得明你噏乜咩？你睇嘅漢字作品向西紅van，湖南人睇得明嗎？Heung Gong Yan Fan Kong？
對方放大呢啲所謂共通點，目的係想縮細啲唔同嘅嘢，例如價值觀。
有邊個去完中國過關返嚟香港，唔係有如釋重負之感？唔係邊個講，係建制派自己講，話啲做生意朋友，人在中國好繃緊，過咗關就身心舒暢。點解？因為對民族主義嘅人嚟講，最唔方便嘅真相，係香港呢個大英帝國創立之地，同中國，根本屬於兩個非常唔同嘅文明世界。
年中咁多人返日本「鄉下」，大部份唔識講日文，語言唔通，但咪又係親切到要叫鄉下。大家去歐洲自由行，好多地方都唔容易用英文溝通，但比起去中國，就算你識講普通話，都係喺歐洲嘅cultural shock細好多。
同樣道理，你用書面語同中國裏面嘅人傾反送中運動，好快發現，就算語言相通，但概念完全唔通，夏蟲語冰，直頭連對話都講唔上，係兩條永不交叠嘅平行線。有自詡中文水準唔錯嘅同行，嘗試刨嗰份大灣區發展藍圖，發現每一隻字都識，但完全唔知內容講乜。而中國最賣座嘅電影，喺香港可以冇市場到，連畫都費事上。
中華膠咒語一起 遮蓋正常思考
呢啲都係大家常見嘅經驗，冇可能唔知，但一旦中咗膠毒，就會先入為主，明明係同事實不符嘅嘢，都有萬九個理由合理化，變得理所當然。始終情感綁架，行之有效，係一條韌力強大嘅線，唔係咁容易切割。於是，當對方一念大中華膠咒語，就會挑起「香港人—中國人」身份認同，遮蓋正常思考。但當出現一連串貼身大是大非嘅事情，「香港人—中國人」身份認同，同價值觀嚴重衝突，就會越來越多人，隱約發現自己潛藏深層次矛盾，然後一步一步，開始去正視，開始越挖越深。各種因素，導致唔同人有唔同步伐，但無論係早係遲，始終都係面對同一條選擇題：大中華膠身份認同，定係普世價值觀。
訴求清晰 港人不願搭極權洗頭艇
中英聯合聲明，喺聯合國登記埋，本應係莊嚴嘅承諾，香港會繼續係自由文明世界嘅一員。但中國而家講到明，聲明只係一紙歷史文物，爭在未攞個正本出嚟拍賣。到今時今日仲有人包括777政權高官，活喺平行時空，聲稱時代革命實情係年輕人上樓問題。但歸根究柢，運動嘅訴求好清晰：香港一定唔可以被綁上飛奔極權世界嘅洗頭艇。
由司徒華嘅「建設民主中國」到老董嘅「中國好香港好」論述，都係將香港同中國包裝成命運共同體。一旦拋開「香港人—中國人」身份預設，就有空間去發掘真實嘅命運共同體。香港以外，仲有其他自由世界成員，要面對極權中國日漸強大嘅引力，分別只係距離幾遠，引力幾大。比較前線嘅，有例如台灣日本，而佢哋係早幾十年，已經要面對久唔久就話佢哋係民族敵人嘅強國，不斷搵出路，搵自己喺世界嘅位置。可以預見，喺777嘅強力鼓動下，香港人嚟緊會喺「香港—？—自由世界」之間，找尋同建構一層一層嘅命運共同圈，真真正正we connect。
撰文：宋漢生
fb : sunghsblog