獲中共捧做樣板差人嘅光頭劉sir、警署警長劉澤基喺大陸走紅，佢喺微博開嘅「香港光頭警長」賬戶有成81萬粉絲，成為強國「網紅」，不過佢個人越紅就越寫越出位，連佢啲大sir唔敢鬧嘅法官，佢都照鬧。日前佢仲將批鬥行動升級，連佢老頂嘅老頂、特首林鄭月娥都公開鬧，話777同勇武深度對話，令佢感到「不敢想像」，反問777差人「日後怎樣執法」，有網民見光頭劉sir越鬧越高級，個個都估佢幾時鬧到去國家主席習近平？
網民：幾時鬧習近平？
光頭劉sir喺微博引述一段疑為《星島日報》報道文字，話民政事務局局長劉江華喺電台節目講，「曾與行政長官林鄭月娥與10多人進行四小時的深度對話，當中包括『勇武』同『抗爭』人士」，光頭劉sir話如果係事實，只可以話「不敢想像」，又質疑「這樣還是法治嗎？我日後怎樣執法？真的是誰大誰惡誰正確？！公理何在？！」大陸網民紛紛為佢感到不值，又質疑777是否與中央政府對着幹等。
其實差人「以下犯上」唔係第一次，之前政務司司長張建宗為7.21事件代警方道歉，結果俾警察隊員佐級協會發聲明炮轟，今次連777都俾個警署警長公開鬧，好似香港特首見乜人都要佢批准，直情惡過中聯辦、港澳辦主任，唔知仲以為佢係太上特首！有網民仲揶揄光頭劉sir幾時鬧到去國家主席習近平？有連登仔話佢咁偏激，「好驚佢下次舉起支槍指住領導人」，仲有人問，唔通「佢想做下任國家主席？」
李八方