郭富城同方媛（Moka）婚後生咗兩個女，分別係2歲大女Chantelle同6個月大嘅Charlotte，老婆咁後生，大把時間追多個仔，不過愛錫老婆嘅城城，就話等老婆休息吓先。其實城城呢排都唔係咁得閒，忙於到世界各地開巡迴演唱會，前晚佢就去到澳門舉行首場《郭富城舞林密碼。夢幻距離演唱會2.0》，方媛仲帶埋大女Chantelle到場睇騷。
跟住跳舞
完騷後，方媛凌晨都唔捨得瞓，喺Ig貼出影片，片中可見Chantelle全程跟住爸爸跳舞，睇嚟遺傳咗爸爸跳舞基因，佢仲揈手揈腳好可愛，當佢喺大螢幕見到爸爸時，仲開心大嗌：「爸爸。」方媛又留言：「整場都在揮舞螢光棒和爸爸一起跳，還一直說爸爸辛苦了、爸爸累，爸爸聽到應該心都融化了。」
片段曝光後，唔少城城忠誠fans都覺得好感動，留言：「跟阿王一齊成長，當粉絲二十幾三十年，自己比他先結婚，再看到他成家立室，一副冧樣，囡囡又靚又可愛，感覺很特別、很感動呢」、「女兒就是這麼貼心，大寶好可愛指住電視，非常可愛」、「小公主超可愛，偶遇幾次都好乖好淡定」。
撰文：馮仁昭