午飯後行街，在天橋碰到年輕世姪揸住杯咖啡，從遮打道九號行出嚟，呢位世姪B當年考試成績不達標，入唔到大學，屋企又無錢送佢去英國美國，於是退而求其次，去讀副學士，佢爸爸與左丁山識於微時，成日話驚住個仔讀完副學士，冇乜競爭力，因為年年有好多大學畢業生爭住搵工也。點知英雄莫問出處，世姪B考到入一間外資行做主任助理，職責係幫RM（客戶主任）執頭執尾，做「影帝」及客戶數據輸入，好等RM能專心向客戶處理產品銷售，拉多啲客戶存款。做了三幾年，世姪B轉工至一間本地銀行，今日已升正為RM，升職之快，令佢阿爸喜出望外。
左丁山問過佢有何秘訣，世姪B話：「阿爸怕我學歷蝕底，成日叫我將勤補拙，我又聽你講過，平時要睇多啲外國財經雜誌，睇多啲網站，所以我晚晚返到屋企上網睇CNB、Bloomberg，朝朝返工搭地鐵用手機聽住財經台，有時上司叫我代佢打多幾個電話，我試過畀客戶問到世界大勢，聯儲局減息諸如此類，我咪照背電視電台啲言論囉，估唔到會有客戶欣賞；我又成日主動替上司打電話call客，佢要負責幾百個客戶，邊度做得晒吖，見我幫到手，咪叫我做多啲，所以我其實好忙㗎，晚晚七八點先至放工。阿爸又教落，有功勞就要歸上司，有事就自己孭晒。所以後來上司升職，佢好大方大力推薦我升級。」
講得好似係龜兔賽跑故事，加上佢考CFP、MPF等等牌照，全不失拖，唔怪得畀人睇中，獵佢頭做其RM，問佢最近係唔係有好多人開海外戶口，世姪B話：「太多，做唔晒，大贏家當然係滙豐、UBS等，FT都有講，但我地都有啲生意，金管局對此好緊張，合規部要我地記錄每一筆大額出境滙款（例如從香港戶口滙去新加坡，銀碼在三百萬港元以上嘅），以便向金管局呈報，金管局日日睇到實晒。我地行家都知道滙豐開新國際戶口，根本做唔切，一啲滙豐朋友話，佢哋IBC要周圍抽調人手去幫忙呀！」咁鬼好生意，益晒滙豐賺取費用（fees）。開新戶口有冇錢賺？當然有啦，譬如一萬個客戶在新加坡開戶口買英鎊，每戶口存（平均）十萬鎊，總金額就有10億鎊，外滙價賺100點子，就有收益一千萬鎊嘅fee income，幾爽！點解突然有咁多呢啲錢賺？騎騎，多謝林鄭特首力推反送中條例，搞出大頭佛嘞！世姪B一如其他年輕人亦係黃絲，返到屋企就同阿爸鬧交，佢對岑子杰被南亞裔街頭襲擊極為憤怒，預備響應網上號召到重慶大廈示威，趕走南亞佬，左丁山聽到急忙叫佢唔好搞，千祈不要在香港搞出種族衝突，喪失國際支持，佢含糊哦哦哦而去，左丁山希望冇事啦！