早排中共高調撐警，一班差人就湧上大陸微博開戶口，事關佢哋唔止係香港畀網民鬧、出到街一樣畀市民指住鬧，但去到大陸微博就唔同，有北京撐自然人人當佢哋英雄，搞到個個飄飄然，光頭警長劉Sir仲係微博鬧法官、教港府點做嘢。不過自從特首林鄭月娥日前對成立獨立調查委員會放鬆口氣，仲話唔會容忍包括警察在內任何違法暴力，呢班差人弱小心靈似乎大受打擊，仲係到呻班警隊高層靠唔住！
回覆連登仔：冇做違法嘢唔會驚
連登有人貼咗一個疑似香港差人「神勇咖哩飯2019」嘅一篇微博，內容話一直知「公司」靠唔住，所以一直做好多自保行為，又話早知遲早會成立獨立調查委員會，相信班上大人交幾個人出嚟送死平息民憤，又話佢哋只係避孕套，用完即棄，所以叫同僚唔好諗咁多，仲話「上級，你要我衝？衝你老母呀」。
呢段嘢梗係俾連登仔拎嚟笑，個個都話咗前線遲早比中共犧牲，係呢班綠衫差人儍到以為中共冇佢哋唔得、有人話白衫高層個個鋪晒後路走人，係呢班企最前又以為自己好勁嘅人先要擔心被清算！又有人話佢唔使發脾氣，做得condom仔預咗！不過原來「神勇咖哩飯2019」有睇連登個po，仲話叫「神勇保險套」幾型喎，佢仲話因為冇做違法嘢，所以佢自己完全冇驚，話就咁話，但有網民發現個po已睇唔到，唔知係咪刪咗？
李八方