特首林鄭月娥公佈嘅施政報告，一出就畀人鬧完全離地，港人叫佢搞五大訴求，佢就隻字不提，仲以為畀人更易買樓就叫回應年輕人訴求！民政事務局長劉江華（圖）噚日上電台節目為政府兜，話政府有聽年輕人訴求，又話之前佢參與林鄭同各界「深度對話」，當中有「勇武」同抗爭者，雙方都有好好對話，但八方聽聞有出席「深度對話」嘅人唔係咁睇喎！
有出席「深度對話」人士同八方講，的確有「勇武」同抗爭者出席對話，但當時大家都提出叫政府唔好用緊急法推蒙面法，因為咁樣只會令局勢火上加油。
當時政府態度似乎好肯聽意見，點知轉個頭就推蒙面法，即係當「深度對話」嘅意見係耳邊風，咁劉江華話雙方有好好對話，根本就唔係嗰一回事。仲有人話即使以後再有呢類「深度對話」唔使再預佢會去，反正政府聽完都唔做！