36歲時的王宗堯撐雨傘運動，意外得到「男神」光環；今年41歲的他參加反送中運動被控告，五年間，王宗堯唯一未變是血仍是熱，眼見政府無能，黑警濫暴，社會撕裂，巿民恐慌，王宗堯心態上都出現無力感，他還是希望可出己之力抗爭到底，守護香港，守護自由。
王宗堯慶幸沒有經濟包袱，家人包容不割席，即使因為「深黃」失去內地巿場，白色恐怖下影響工作和收入，他也無悔承擔一切後果，還甘願耗用積蓄出錢出力撐手足、撐黃店。王宗堯堅持做有良知和公義真港人，「香港人𠵱家好清楚值唔值，唔係用金錢衡量，有好多價值遠遠超乎金錢價值。」
撰文：比華利
攝影：陳俊強
深黃標籤
王宗堯參加2014年的雨傘運動，凌晨留守龍和道一役被封男神。不過，這個光環，沒有為王宗堯的演藝事業加持，相反被標籤是「深黃」。「深黃」身份，馬上斷絕內地巿場，王宗堯只能參與本土製作。今年6月反送中運動，王宗堯勇於發聲，過去四個月不斷上街，在沒有預警下，他在9月30日上午被警察持搜查令到寓所拘捕，扣留了36小時，41歲生日前夕獲准保釋，生日翌日提堂，控方指王宗堯7.1曾現身立法會會議廳一分鐘，被控非法進入逗留立會罪，案件12月13日再上庭，王宗堯不准離港，每周要向警署報到，也不准踏足龍和道、立法會道、夏愨道及添華道一帶。
這個經歷，令王宗堯心態上有轉變，他再次走在熱鬧的銅鑼灣，不少途人眼望望，其間有黃tee男上前握手，叫他「加油」，王宗堯報以友善微笑，其實他的付出，香港人是感受到。
英籍護照
王宗堯日前接受《蘋果》專訪，重提被拘捕當日早上情況，「嗰朝7點半，警方攞咗搜查令嚟我屋企，佢㩒門鐘嗰一刻令我愕然，有窒一窒，最怕佢哋嚇親我啲貓，佢哋五、六個人嚟，嗰日係9.30，第二日就係10.1，拉前一晚9.29發生好多事，拉咗好多人，我嗰晚好夜返，瞓唔着。去到囚室，見好多人，知道佢哋舉動係大搜捕。」拘捕事件未有打擊到王宗堯，他堅定的說：「我從來冇諗呢件事係我人生污點，或者打擊，我出返嚟仲同黃之鋒見面，又同羅冠聰喺group傾偈，我仲講笑話佢哋有坐過，我今次都坐過，大家距離拉返近啲。」他要跟黃之鋒和羅冠聰兄弟齊上齊落，王宗堯還說：「我反而擔心近排出現嘅被自殺、性侵、濫捕、虐打同警察卧底行為，參加運動或支援者嘅自身安全。」
由雨傘運動到今日的反送中，王宗堯熱血未減，「冇分別，本身係熱血就係，我反而覺得今日更多香港人勇於表態，唔再係要求撤回惡法咁簡單，變咗係關心社會問題同政權暴力。」王宗堯指出警察濫用私刑可能一直暗存，只是以前未被揭發，「可能以前冇咁嚴重，遮遮掩掩會克制啲，𠵱家就每日都發生，肆無忌憚，無差別拉人，香港回歸咗僅22年，未一半（指50年不變），就喺2019年發生咗咁多事。」
不諱言擁有英籍護照的王宗堯，未有計劃離開香港，「年輕人冇條件走，好想保住呢個地方，大人呢個時候如果選擇放棄，唔守護呢度，年輕人就會更無助，呢次睇到年輕人對社會責任嘅心，有夢想，好熱血，大人雖行唔到好前，都要兄弟爬山，各自修行，多啲同後生溝通，用社會經驗、學識、歷練畀方向佢哋。我覺得呢刻，未係時候急於放棄或離開，前線被捕咗成2,000人，需要更多人行出嚟，各區遍地開花，那怕只出嚟來唱吓《願榮光歸香港》，叫吓口號，都係一種情緒宣洩，互相鼓勵。」
從容對人
「黃絲」的王宗堯，事業受政見影響，他說：「6月嗰時，我有講過話完成手頭工作，會暫停一陣，冇諗過反送中會搞四個月，呢啲環境冇辦法，一旦離開線上，只係個幾鐘，已miss咗好多嘢，我會好擔心，作為演員，拍戲將現實時空放開，好折磨心態，𠵱家會為之前拍落嘅嘢做宣傳。」近年工作量減少，「無疑係會有白色恐怖，有自我審查，去到NBA事件，我哋都要靠大中華巿場，我哋行業，發聲唔係自己一個人嘅事，仲有劇組、院線，政見上同下面從業員分野好大，幕前即使好關心好想發聲都要放棄。」王宗堯自嘲星途「暗」了，即使演藝事業受阻，他仍堅決做人不能埋沒公義和良知：「我今日得到嘅工作機會同知名度，係香港畀我，如果我要為咗利益，攞咗光環就拍拍『籮柚』走咗去，我做唔到，我唔想跪低，我當呢度（香港）係屋企，我身邊好多朋友都做唔出。」
家境不錯的王宗堯，中學讀英華，中四便赴笈英國，在當地大學修讀經濟統計學，回港未有打理家族生意，卻走上幕前。慶幸他的政見獲家人包容，未被「割席」，「我阿爸係一個講義氣嘅人，佢好細個靠自己用雙手打江山，佢去歐美做生意，鼓勵我哋接受外國思想，爸爸教曉我哋要有承擔同良知，父母係會擔心自己小朋友，阿爸係擔心我，但佢知我做緊乜，我比好多小朋友（抗爭者）好，唔怕父母經濟封鎖。」自給自足的王宗堯，沒經濟包袱，他會向沒錢開飯、沒車回家的前線手足伸出援手：「我哋唔係用『幫』字，我哋會陪佢哋一齊渡過難關，會嘗試去做佢哋心靈支柱。睇到佢哋咁，做大人係會心噏，佢哋肯出嚟擋子彈、食催激彈、被扑頭、坐監，佢哋犧牲咗2019嘅暑假，我哋對佢哋都要做返啲嘢，盡做呀！」
由佔中到今日逆權運動，五年的速變可有同時打亂41歲王宗堯的人生計劃？他說：「以前冇諗過香港會變成今日咁，亦冇諗到發生喺2019年，我個人喺呢五年有轉變，對事或自身遭遇上從容咗。」結婚生仔計劃要延遲嗎？「嗰啲睇機會，呢啲未係我人生planning最重要嘅嘢，呢幾年心思除咗擺喺做嘢，我會諗多啲關心同回饋社會，可以幫到人，會更有成就同滿足感，好過接好多戲拍，唔係下下係賺錢，有好多人覺得曝光率好緊要，有好多人淨係諗住錢，我會覺得自己想多啲經歷或見證一啲嘢，身邊多咗好多溫暖人心嘅古仔，有遇到守護孩子嘅陳伯，同一班守護抗爭者嘅專業人士、法律團隊，公義真係好緊要。」問到會否考慮從政？他說：「我仲未有資格，政治意識未係咁強，暫未有咁打算，有機會先。」
阿倫契仔
王宗堯早年曾簽約藝能旗下，當時有報道形容他是「譚詠麟契仔」，對於曾提攜過他的前輩譚詠麟高調撐警，阿倫此舉已遭部份粉絲「割席」，王宗堯也感慨：「我喺校長身上，睇到好多前輩應有嘅特質，我覺得可能年紀問題、利益關係，可能佢身邊好多生意來往嘅人，係需要咁做。」
