【姐匙Talk】二毛背正印嗒大眼妹

【姐匙Talk】二毛背正印嗒大眼妹

有日Jessie去咗間星級雲吞麵店食細蓉,話晒呢間麵店好多藝人幫襯,撞到明星都唔出奇。嗰日Jessie食食吓麵見到一男一女行入店,仲要揀店內最最最隱蔽嘅位嚟坐,當然喺八卦心態下,咪望一眼囉!原來係搞笑能手「二毛」。二毛嗰日間唔中周圍望,睇吓有冇人認得佢,會唔會搵佢集郵、簽名,可惜係,冇!個個顧住食麵,冇理過佢。

坦白講,做藝人唔單止要keep住人氣,紅嗰陣要無時無刻要保持良好嘅品格。點解咁講,想當年Jessie有次去內地探班,導演、劇組人員同Jessie打晒招呼,仲獲得監製批准去片場探班。不過當年二毛好紅,拍乜都有人笑。嗰時Jessie去到現場,先同導演、仲有男主角二毛打招呼,初時佢見係香港記者過嚟,同聲同氣,懶好咁問候,仲問食咗飯未,但咪以為佢咁好人,其實佢嫌Jessie阻住媾女。

當日同場有內地嘅大眼妹,當年大眼妹仲未走紅,難得同二毛合作,就落足電力去勾搭。Jessie喺片場逗留唔夠半個鐘,就俾劇組人員叫出去外面等,話演員要放飯,等到飯後諗住返入去繼續探班,竟然食閉門羹。後來打聽到當年有女友嘅二毛,背住正印同大眼妹搞埋一齊,大眼妹又嗲又主動,二毛唔出軌就難!
撰文:Jessie

姐匙Talk

我姐匙縱橫歌影視幕後,多年嚟冷眼旁觀,娛樂圈大小事都走唔過我雙眼,歡迎大家嚟剝花生。