加泰羅尼亞近期同香港一樣爆發示威，連機場都被堵塞埋，結果巴塞隆拿喺上周六西甲作客伊巴場波，冇得搭飛機要改坐六個鐘巴士去當地比賽，但球員就冇因為太攰而走樣，憑三叉戟基沙文、美斯同蘇亞雷斯一人一球，大炒3:0。另外，加泰示威持續，原定今個月26號喺魯營踢嘅「國家打吡」都要延期；西班牙足總要求各方必須喺周一前達成共識，有指兩隊都希望推遲去12月18日踢。