古天樂和宣萱相隔17年再度合作拍新片，兩人再次扮演情侶，電影結局古仔被槍殺，將眼角膜捐給宣萱助她重見光明，結局淒美。現實中，兩人識於微時老友鬼鬼，他們甚至互當對方是同性好友，宣萱更踢爆當年被古仔連人帶凳一腳踢開，玩得相當瘋狂。
撰文：王連連
攝影：陳俊強
古天樂和宣萱在劇集中多次扮演情侶，最令人深印象是《尋秦記》，近日二人相隔17年於電影《犯罪現場》再度合作。宣萱指開拍前很期待，感覺拍檔成熟不少：「我睇住佢入行，睇住佢轉變，《餐餐有宋家》第一套合作，佢初初唔講嘢，好靜嘅，我成日撩佢講嘢，佢都係一句起兩句止，到𠵱家佢做嘢好認真，一眼關七兼顧晒。」
睇住彼此成長
宣萱表示最難得看到古仔變得越來越好：「經歷嘅嘢好多，個人成長好多，向好方面轉變，喺我角度就諗佢可以放鬆啲啲就更好。佢能夠做自己喜歡嘅，同時間幫好多人，keep住個電影圈一路行緊，又做慈善、對小朋友好、又起學校，佢會好唔得閒，但佢開心就可以。」古仔則覺得宣萱沒有太大改變：「喺性格上冇乜唔同，好難得。做呢行要保持自己性格又生存到係好難，最緊要佢做咁耐冇俾呢行污染。」他更讚老友有愛心、喜歡小動物，注意生活平衡。
當對方係同性
古仔和宣萱間中會在朋友飯局相見，但沒有刻意單獨找話題，不過自從古仔多參與電影製作後，變得很難有空聊天，他說：「啱啱拍完嗰套（《尋秦記》）更加講唔到一句嘢，嗰套嘢真係搞到我暈咗喺度。」兩人一起自然回憶過往拍劇的點滴，宣萱說：「以前玩癲好多，佢冇當我係女人，我又冇當佢係男人，好似我喺辦公室坐喺一張凳，佢可以連人帶凳一腳踢我出去。」在旁的古仔即解釋：「當時佢喺外國返嚟，外國返嚟嘅女仔較易相處，佢大癲大肺、不拘小節，我對同劇其他女仔唔會咁。」