【驗樓直擊】屯門「龍床盤」菁雋入伙，兩大驗樓師驗收兩個高層劏房，由一梯29伙爭3部升降機的走廊，走到實用164方呎單位，驚喜浪接浪，坐廁旁邊有通風位被飽覽無限春光，開放式廚房的「BB鋅盆」僅兩吋半深，遠低於一般新樓鋅盆深8至9吋。至於另一個實用141方呎的同層劏房，廁所面盆細如洗牙盆。兩單位驗樓評分分別為59分及44分。
廳房空間僅73方呎
第一個驗收單位是高層單號劏房，驗樓師詹濟南（詹Sir）同行7人擠入屋，的確人人企得入，但業主與友人寧願企出屋外等結果。單位標明實用164方呎，實地度尺，走廊及露台這些不等使的空間合共佔約40方呎，廳房合一的方形空間僅約73方呎。詹Sir相信，擺完床後，其中一邊必貼近窗戶。碰巧現場有一條及膝高度的短梯，他現場模擬日後於床上開窗的情況，並謂：「咁近距離開窗真係好危險，隨時會搞出人命」。
入屋右邊是廁所，廁所門窄頂膊頭，「想行得正企得正都幾難」，記者同行入企缸觀摩，閂了浴屏門，卻無法打開。詹Sir指，浴屏門扇膠邊「反脷」夾死，「條脷（門邊膠）反咗，太暴力唔得㗎，只會越夾越實。」目前浴屏門一邊有膠邊，另一邊無，如在未有那邊加裝另一條膠邊可減輕反脷。至於洗手盆櫃歪斜，櫃門推左會自動移向右。詹Sir再轉身檢查坐廁，發現坐廁旁有通風位，「嘩！用緊廁所嘅時候就被人睇到個八月十五喇……（然後他走出廁所從外面睇返入來）仲望埋浴室」。業主坦言心噏：「見到個廁所，同其他新盤真係好唔同，真係好騎呢。爆緊石時，通風位可以望晒，都唔知有啲咩可以講」。
開放式廚房焗爐組裝亦有別於一般新樓裝崁入櫃的做法，詹Sir徒手將之拉出拉入，直指馬虎，因為打開爐門，整個爐搖擺不定。鋅盆更是神奇，深度僅2吋半，一般新樓鋅盆都有8至9吋深，詹Sir打開廚櫃便找出原因，無非遷就下面放置的洗衣機，逼得鋅盆變成「BB盆」，莫說洗菜、洗煲，就連水杯都高過盆。
全屋僅得3面牆，卻仍有部份牆身及天花有污漬及不平滑，建議扇灰及重髹。露台隔音版多處凹陷，慶幸不影響減噪效果。但洗手盆水龍頭邊漏水落櫃底，水塞控制捍甩到可以一抽全條拔出來。15項工種，油漆及潔具來去水均零分，僅批盪及假天花不用扣分，最終得59分。業主聽到得分後，稱「其他新盤都有70分或以上，現時59分真係有啲失望！」
廁所面盆如洗牙盆
另一個同層雙號劏房，實用141方呎，資深驗樓師賴達明指，廁所面盆細如洗牙時用作漱口的洗牙盆，開放式廚房同樣有兩吋半深的「BB鋅盆」，一樣為了遷就櫃內洗衣機。交樓瑕疵一隻手也數不完，全屋5處空鼓批盪，包括面向浴室牆身3處及天花橫樑側牆2處；浴室7塊空心磚；大門門框未做收口有大隙；大門門檻石材有2處膠邊爆裂須修補等等，最後只得44分。
佳源國際回應，菁雋由集團與陞域集團合作發展。對於部份單位問題，合資公司已派專員跟進，並全程監督執修之進度。集團致力為消費者提供優質服務，提升住戶的生活體驗。
記者︰陳家雄