高齡鍵盤戰士689成為政治閒人後，每日幫《蘋果》數廣告，而佢為咗喺逆權運動中刷存在感，除咗不停用全國政協副主席身份寫信，向學校施壓開除被捕學生，另一僅餘貢獻，恐怕係搞咗個「803」篤灰網，懸紅追緝所謂「亂港暴徒」。佢噚日忽然講人話，喺facebook出帖話懸紅30萬緝拿襲擊民陣召集人岑子杰嘅有關人士，唔通689終於轉性良心發現？
大家咪咁開心天真，雖然筆懸紅係真，但睇番篤灰網，塗污中聯辦外國徽同緝拿丟國旗落維港個懸賞分別高達100萬，就連噴黑立法會內區徽都有50萬，反而岑子杰被暴徒用鐵鎚打頭，懸紅竟然仲低，如果咁都唔係因為政見不同而有差別對待，就應該反映有人認為人命嘅價值，連國旗、國徽呢啲死物都不如囉。