香港人想一班PoPo世世代代留喺大灣區，可能真係會美夢成真。俾網民形容為低級警察協會嘅警察員佐級協會嗰個惡過政務司司長嘅主席林志偉，前日向會員發信，同一班前線低級警透露正聯同政府華員會向雅居樂集團商討，喺鄰近肇慶東站起個「肇慶香港城」，畀退休警同公務員有養老選擇，仲話構思進入實踐階段，預計第一期出年底落成，而當中最重要訊息係協會盡量同雅居樂爭取「最優惠價格」團購。
呢個特色社區會以「港式生活」為賣點，但咁鍾意返大陸又要過港式生活，分明係口裏說得，身體卻很誠實。而警察咁樣公然向商界「爭取」利益，老老實實，自從廉政公署成立後，八方真係冇再見過。
林鄭考察 港式生活做賣點
林志偉講到自己有份成功爭取「香港城」，但睇返資料，呢個本來就係肇慶市政府重點發展項目，由雅居樂集團投資300億元，林鄭今年5月仲去實地考察完。之不過，肇慶政府本身期望利用香港城，等香港向大灣區城市輸出酒店管理、醫療、教育呢啲經驗，畀大陸同國際制度接軌，但唔知退休警喺呢個層面會有咩貢獻，到時究竟係輸出如何專業濫權濫暴，定分享俾美國制裁嘅經驗呢？
李八方