特首《施政報告》想轉移視線，打民生牌，然而，政治問題一日不解決，民生壓力難以緩和，經濟更將會慘不忍睹。
以前，有些位於prime location的戶外廣告牌，閒閒哋要排半年或以上才可以等到有位。如今，只要去中環一帶睇吓，就知道香港經濟已進入了寒冬。
那些被高檔時裝品牌長期霸佔的廣告牌，最近竟然被環保團體取而代之。好明顯，就係因為marketing budget被公司凍結或抽起，根本就唔會有人落廣告，所以劈價以超筍價，甚至乎免費益吓啲NGO囉。同期，有些大廈外牆廣告牌，自十·一國慶完結而落畫後，至今仍是丟空。我聽講，有些已經媒體費用全免，淨係支付海報印刷及安裝費，竟然都無人吼。
你可能會話，才幾萬元製作費就可以出到一幅幾廿萬的黃金地段戶外廣告牌，點解有寶唔識執？其實，近排有好多客戶都不再出新廣告，就算有千百憑證說明比原價平十倍，都搵唔到一個理由點解仲要賣廣告，咁嘅時勢，梗係慳得一蚊得一蚊啦，少做自然少錯。
有些商場更帶頭全場劃一減價，又或者派發$500購物禮券以催谷消費；更有些商場大業主實行全世界租戶減租，但減所謂受影響月份，在如此局面，都唔知要減幾耐先減得完。當然，香港人，最叻能屈能伸，放長線，打住捱，捱住打。以上兩樣措施比較，似乎減價好過減租。試想想，減價可以係一時三刻，比較有彈性，最終可以令顧客受惠，又可以幫補吓啲租戶，一舉兩得。相反，減租可以即時紓緩租戶的財政壓力，但假如無顧客光顧，一直拍烏蠅，都係無補於事，救得一時，唔救得長久。
說穿了，所有這些都是治標唔治本、被動得很的相應措施，一日最根本的政治問題唔解決，一切民生、經濟、社會問題只會越來越差。
文迪晞
mailto:[email protected]