賭王何鴻燊嘅三、四房子女近年紛紛成家立室。不過，賭王嘅第三代成員中，二房何超鳳嘅24歲大女何鍶珩（Beatrice）最為活躍，身在美國紐約定居讀書嘅Beatrice，不時喺社交平台分享點滴，佢嘅情史甚為豐富，曾經俾傳媒報道有個拍拖三年嘅金融才俊Kenneth Li，2017年分手後戀上外國人，之後就同黑人富二代同學Jordan拍拖。
超鳳讚合格
不過，Beatrice去年已經換畫，同另一名外籍男Greg Merrill蜜運，仲偶然喺社交網晒合照。Greg今年暑假仲匯合女友同超鳳遊意大利，超鳳喺上個月出席活動嗰陣，坦言見過女兒男友，話接受到女兒同外國人拍拖，大讚Greg有禮貌非常合格，不過就直言會「調查」囡囡男友嘅背景，而且女兒讀緊碩士，應該唔會閃婚。
據知，Greg比Beatrice細幾個月，一樣係讀美國名牌大學普林斯頓（Princeton University），主修政治，大學以優異成績畢業，亦都係大學棍網球嘅校隊成員，𠵱家Greg喺紐約投行做金融，事業剛剛起步。
撰文：馮仁昭