香港警察嘅暴行名揚國際，早前仲有埋台灣內政部認證，台灣作家九把刀呢個星期喺facebook出帖為小說取材，本來想搵網民集思廣益，問大家現今社會咩職業係「最丟臉最可恥」，點知引嚟港台兩地網民列隊式留言，齊齊寫低「香港警察」四隻字。
八方睇過啲留言，最先寫低呢個答案嘅網友，留言獲近千個正評，連「高雄市長韓國瑜」都望塵莫及，所以「香港警察」可謂眾望所歸。呢個答案相信九把刀事先完全冇諗過，於是留言話「放在十年前根本難以想像」，但香港網民就回佢一句「十個月前已經難以想像」，有人就話香港家陣處境如同刀大筆下嘅「無法十日」，仲拜託佢一定要寫香港警察，以文字彰顯正義。八方好期待刀大快啲寫返個《那些年，我們一起鬧的黑警》故事，如果拍埋電影，相信仲會有票房保證。