國際賽期後，英超嚟緊禮拜日會上演雙紅會，由曼聯主場迎戰利物浦。紅軍賽前就傳嚟好消息，門神艾利臣比加終可復出，上輪受傷嘅前鋒穆罕默德沙拿亦無大礙，紅軍可以「夫添」出戰，力爭跨季18連勝。
不過對手曼聯就無咁好彩，原本已經傷兵滿營，國際賽期西班牙嘅迪基亞仲因傷退下火線。領隊蘇斯克查已經打定輸數，認為迪基亞趕唔切復出，亦話中場主力保羅普巴肯定缺陣，呢場雙紅會，紅魔最壞情況可能有成雙位數字傷兵。
傷埋迪基亞格連活特
曼聯門將迪基亞喺禮拜二為西班牙作客瑞典嘅歐國外賽事，拉傷大腿肌肉傷出，領隊蘇斯克查周三接受訪問話：「迪基亞需要檢查先，但睇嚟佢就冇法趕及上陣。」，預計曼聯會由阿根廷嘅羅美路把守最後一關。隊中另一主力普巴國際賽前右腳已經受傷，雖然佢去咗杜拜治療希望盡快康復，不過蘇B已經確定呢位法國中場唔會喺雙紅會上陣。
紅魔小將格連活特最近因背傷退出英格蘭U21加入傷軍名單，加埋達洛治、連格同艾歷拜利等人受傷，曼聯家陣有多成11個傷兵。唯一嘅好消息係，蘇B指安東尼馬迪爾同雲比沙卡有機會喺呢場大戰復出：「馬迪爾同雲比沙卡上個禮拜有參與球隊訓練，可能會踢到30至45分鐘，但家陣仲未能確定。」
冬窗吼麥迪臣梅拿
雖然曼聯好可能要喺雙紅會中殘陣應戰，但有指紅魔已經展望一月嘅冬季轉會窗，希望大灑金錢引入多名球員救亡。中場方面，曼聯嘅首要目標就係李斯特城中場占士麥迪臣，希望可以用佢嘅創造力解決家陣紅魔中場攻力不足嘅問題。另外，有指紅魔已經放棄追求巴塞中場拿傑迪錫，改向後生啲嘅馬德里體育會中場沙奧尼古斯埋手。
前鋒方面，除咗早前有傳已經同紅魔達成口頭協議嘅祖雲達斯前鋒文迪蘇傑外，亦傳出同樣想搵喺拜仁慕尼黑冇乜機會嘅湯馬士梅拿，分擔吓拉舒福特同馬迪爾嘅工作。
另外，曼聯亦對多蒙特嘅英格蘭翼鋒查頓辛祖有興趣，呢位前曼城青訓近年喺德甲表現出色，歐洲隊隊都想要，可能要好高既轉會費，所以亦搵定里昂前鋒穆沙迪比利做後備方案，呢位前鋒今季法甲已經攻入六球，加上只年僅23歲，絕對可以用嚟長線投資。