中國國足喺世盃外亞洲區第2圈頭2輪氣勢如虹，先後大炒馬爾代夫同關島兩支弱旅，令到國內球迷好興奮。不過星期二作客菲律賓就打回原形，全場多達35次攻門之下一球不入，最後只能夠同主隊踢成0:0，爭小組首名晉級現暗湧。
菲國神龍屢救險球
相比起馬爾代夫同關島兩支弱旅，菲律賓實力確係高少少，但牌面計都唔係國足對手，喺星期二賽前，2隊歷來交手8次，國足唔單止全勝，仲合共入50球只失1球，正路今場波都唔算係考驗。不過效力英冠球隊卡迪夫城嘅菲律賓門將艾法列治，賽前就大打激將法，話自己對慣英超頂級球星，完全唔會擔心國足嘅攻勢咁話。
唔知係咪聽到艾法列治咁講，國足班球員今場份外落力，全場圍攻菲律賓。不過艾法列治全場都表現神勇屢救險球，仲喺補時階段救出咗蒿俊閔嘅禁區內撞射，成功阻止國足絕殺。最終國足喺全場35次攻門14次中框嘅情況下只能摸和菲律賓0:0，痛失兩分，國內傳媒更以「創造恥辱般的紀錄」嚟形容今場賽果，可見國足嘅處境相當尷尬。
其次係今場和波之後，國足嘅小組榜首位置已經俾敍利亞取代，失去咗首名出線嘅主動權。國足下輪比賽將會作客敍利亞，假如呢場波再有閃失嘅話，隨時會俾對方拉開至五分差距，到時要爭取直接晉級就難過登天，因為一旦只係排小組第二，就要計晒八組次名球隊嘅成績先可以確定可唔可以出線。
伊朗爆冷不敵巴林
國足教練納比被問及今次歷史性不勝菲律賓，納比就話往績唔等於一切，外界唔能夠期望國足每場都大炒對手八球。
除咗國足之外，今輪世盃外都出現咗唔少爆冷賽果，其中同香港同組嘅C組種籽伊朗作客巴林，喺精銳盡出兼全場圍攻之下竟然爆大冷輸0:1，賽後伊朗就以2勝1負排小組第3，落後排首、次位嘅伊拉克同巴林一分，出線形勢相當混亂。