講到文宣設計，八方唔係設計底，當然識條鐵，但都仲知道有啲內容唔可以亂咁用。不過，理大嘅土木及環境工程學系近日似乎顛覆咗呢個原則，出咗幾張真災難級設計海報，用咗美國911事件同前年倫敦西區Grenfell Tower住宅沖天大火嘅相去宣傳學系課程，兩場慘劇死傷者無數，雖然學系課程有消防工程學，但用咁嘅相抽水宣傳，如同向死難者傷口灑鹽。
其實八方最初喺網上睇到啲海報，已經覺得太匪夷所思，仲一度以為係改圖，冇諗過竟然係真。呢個咁嘅宣傳手法肯定係一場公關災難，理大就話土木及環境工程學系用有關火災嘅圖片，原意係希望透過圖片讓受眾明白結構同防火工程學對防範重大火災起緊重要作用，又話學系知道事件引起迴響，已經立即跟進。其實呢啲文宣設計，就唔會由設計師自己話事，中間一定仲有人把關審批先可以出街，八方就好奇，點解冇人認為咁嘅設計有問題？
李八方