朋友喺Fb呻：「點解Apple咁冇骨氣？」另一個就話：「冇晒教主生前嘅叛逆精神。」
Apple最近行徑，令好多香港人感到意外，唔止因為超多人用iPhone、iPad或者Mac，更重要係，大家一直信任Apple，因為佢過去曾用心保護用戶私隱，唔輕易向政權屈服。誰不知，近期竟接二連三發生，Apple向中國政府下跪嘅事件。
鬧得最沸騰嘅，梗係HKmap.live程式下架，成件事最核突係，Apple三番四次轉軚，最初個App上架無問題、過晒審批，然後10月2號忽然下架，過兩日又批准上返，但俾黨媒攻擊之後，10月10號卒之又落番架。
Tim Cook仲好意思發聲明，話根據香港警務處資料，個App係用嚟追蹤及傷害警員、個別市民及其私有財產，已違反香港法例，所以先要下架。單憑警察片面之詞，又無證據，就決定下架，既無視用戶，又唔理開發者，絕對稱得上wake-up call。喺呢件事處理而言，Apple管理層實在無能。
事實上，單係2018下半年，Apple就中國政府就要求，下架了517個App，其中有色情和賭博類別，亦包括VPN和新聞類。對於中國的要求，Apple只曾拒絕2次。仲未計，近期揭發中國地區iOS設備，若瀏覽由騰訊發出的「惡意網址」，就會將用戶的IP地址傳送給騰訊。
點解Apple搞成咁？其實唔難理解，首先，中國市場係Apple繼美洲同歐洲及中東之後，全球第三大市場，更重要是，Apple相當依賴中國的供應鏈，公司在中國地區間接聘用過百萬勞工。
我的理解是，目前依賴硬件收入的Apple，當產品要走出實驗室，仍要靠中國生產。一切都係錢作怪，未來消費可以點揀？就係一家公司如果喺中國市場越失敗，反而越值得大家注意。
尹思哲
http://linkedin.com/in/wanszezit