徐天佑昨早在社交網貼相留言，悼念前晚突因病離世的舞台劇界幕後人曾浩賢，他指自己錯過欣賞對方監製的舞台劇《I sick leave tomorrow》。
天佑表示：「早兩星期有位不常聯絡嘅劇場幕後朋友，因為擔心我當時嘅狀況，來電向我問好，又邀請我去睇佢有份製作嘅舞台劇，話一班幕後朋友會喺後台等我，就算我一個人去睇都唔會孤單，我知道佢係想畀啲關心我，結果當日，我有啲病所以冇去到，我仲話，下次啦一定有機會，然後佢就叫我︰『好好照顧自己』，估唔到呢句就係最後一句，我連多謝收到佢嘅關心都未講，昨晚突然收到消息佢已經離世。Rest in peace Ah Yin！」
而蘇玉華及袁富華亦有在社交網留言悼念曾浩賢，據了解阿賢在W Theatre擔任監製及藝術行政工作，故與不少劇場界及娛樂圈中人稔熟。
撰文：寶妮