淑女唔易做！因為大家都對淑女嘅要求好高，除咗出身名門，仲要知書識禮、有氣質、有修養、有禮貌，身為國際都會嘅香港，都有唔少名門淑女，好似淑女「飛飛」，佢出身富豪之家，有個錢多到幾世都使唔完嘅富爸爸，絕對稱得上淑女嘅身份。
可惜，飛飛虛有淑女之名，卻冇淑女之實，事關佢份人好鬼自私，唔知係咪覺得自己高人一等，經常目中無人，傳媒手足見到佢都唔多like。話說有次「飛飛」出席慈善活動，就衰咗兩宗罪。由於喺戶外舉行，烈日當空，冇時間觀念嘅飛飛唔知守時係美德，第一宗罪係衰遲到。落車之後，飛飛仲要完全零歉意，冇為自己嘅遲到同大家講聲唔好意思，而係企埋一邊掛住喺度傾電話，無視其他人呆等兼乾煎，足足傾咗差唔多15分鐘。最後，大家終於等到佢收線，活動可以宣佈開始，但全場人已經熱到大汗叠細汗，主辦單位都唔敢向佢詐型。
當日在場嘅傳媒都好谷氣，估唔到飛飛讀咁多書，出身名門千金，可以當遲到係奉旨，唔知係咪因為屋企環境太好，自細俾家人寵壞咗，所以覺得自己遲到冇問題，全世界等佢就係應份。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。