【勇武起來】
雄仔（化名）、傑仔（化名）及陳先生（化名），三人上班時穿起制服做白衣天使，下班後化身黑衣人，走到抗爭最前線。逆權運動逾四個月，警方拘捕超過二千人，開實彈槍漸成常態。三人坦言怕死怕被捕，但當看到政府圖以極權手段滅聲、警暴無底線、甚至只有10多歲的學生被捕時，他們決定只要仍有一口氣，會繼續上前線，並會轉守為攻。即使因被捕入罪而被釘牌也無悔。
記者：陳沛冰
雄仔最初只在衝突現場做急救員，到8月5日三罷當日，首次嘗到催淚彈的威力，眼水、鼻水及口水不自控地流，同時又要治理傷者，「點解小朋友為咗香港，咁辛苦都要出嚟？」他決定脫下反光衣換上黑衣，蒙面上前線。「成個社會好多唔公義，尖沙嘴少女被射爆眼，警方唔認錯；我唔想再被中立嘅道德枷鎖困住自己，唔可以救火唔可以掟嘢」。他曾認真衡量護士牌及社會運動的重要性，「諗起孫中山放棄行醫因為要搞革命，做醫護只不過救到一小撮人，我𠵱家出嚟係救緊全香港人。如果因為咁吊銷我護士牌照，我唔後悔，係心甘情願」。
自言懦弱的雄仔，最初在前線只做滅煙隊。隨警暴不斷升級，10.1他首次拿起磚頭，是他第一次有決心將磚頭擲向警方，「局勢惡化係政府同警隊造成，想我哋恐懼，就係咁打係咁拉，但係官逼民反，帶嚟歇斯底里嘅行動」。他指，前線抗爭者只是相應警方的武力，而提升自己的武力；若如外界所指暴力是來自示威者，「應該呢幾個月來已經有警察失去性命」。
兄弟爬山，各自努力，但雄仔認為和理非未盡全力，就像他一位自稱黃絲的好友。「我哋做勇武，付出受傷、被捕、前途；𠵱家已經有人同你擋子彈，叫你唔好食元氣，你都做唔到，我好失望好心悒」。他希望和理非在三罷等行動中「做盡啲」，「10月1日有人中槍，第二日大家好似冇事返工返學，真係好唔logical（合乎邏輯），返工仲有咩意義？」他更不介意政府「助攻」，甚至用緊急法封鎖IG、facebook等，令和理非也變勇武。
「我哋係成年人，如果連出嚟保護小朋友嘅勇氣都冇，仲講咩守護香港。」
與雄仔一樣，傑仔由和理非變成勇武的轉捩點，也是8.5三罷及七區集會。當日警方在傑仔居住的區內放催淚彈，他衝前想滅煙，但沒有裝備，走入催淚煙範圍兩、三秒已忍受不住走出來，要急救員幫他洗眼沖皮膚。那種保護不到自己家園的無助，令他認真思考要買一套裝備，「見到好多手足都係學生，好痛心，我哋係成年人，如果連出嚟保護小朋友嘅勇氣都冇，仲講咩守護香港！」
傑仔說，決心走上前線就沒顧慮太多，包括可能因被捕入罪而被釘牌；雖然想到要供養父母及照顧家庭成員，但思前想後，他仍繼續勇武之路，「𠵱家已經開始禁蒙面法，可能以後連遊行集會發聲嘅機會都冇，唔趁𠵱家走出嚟，之後可能唔再有機會」。
為了香港的前途，即使怕死怕被捕，傑仔繼續押下自己前途甚至生命抗爭。9.29他與手足在政總與解放軍總部之間，做傘陣與警方對峙，突然有一粒海綿彈彈殼反彈到他身上，「自己都好驚，嚇到彈起」。警隊瀕臨失控，10.1傑仔也進化至脫下燒焊手套，放下用來淋熄催淚煙的水袋，兩隻手也拿起磚頭，準備當防暴警察推進時還擊。
每次「發夢」後回到家，傑仔身心接近崩潰，「撻落床自然聽到側邊好似有人叫口號，會發噩夢，每晚瞓一、兩個鐘就醒」，但他跟自己說，「呢個運動一定要行落去」。
「如果只為守住個護士牌，我又唔出你又唔出，只會加速呢場運動失敗。」
他認為，香港回歸22年，以往因社會富裕，市民不理政治，「港府、中共喺幕後做緊一啲嘢去限制市民嘅自由，或者官官相衞，發生事冇任何官員需要問責或下台」，積壓下來的民怨至反送中一次過爆發。「呢場運動已經返唔到轉頭，就算政府回應五大訴求，之後一樣可以修訂其他惡法。立呢條例（蒙面法）其實都預咗會濫用呢條法例去騷擾市民，所以更加要企出嚟，唔會因呢條法例而退縮」。
在前線做哨兵及滅煙的陳先生則認為，要提高這場革命逆轉勝的機會，要將最強後盾和理非也變成勇武派。9.29他在前線見到手足的數目明顯減少，因被捕及被檢控的手足不斷增加，他們或要遵守法庭規定，宵禁或禁足示威區。「前線少一個就好少，多一個就好多」，加上警方及示威者的暴力不斷升級，「如果仲畏手畏尾唔參與，只為守住個護士牌，我又唔出你又唔出，只會加速呢場運動失敗，因為再冇得同警察鬥」。
四個月來陳先生沒有忘記上前線的初心，是要對抗不公義的制度。7.21及7.28他在上環最前線，若走慢一步便被速龍制服。多個抗爭日子，若非有「救命遮」，他已被橡膠彈或布袋彈射中。既然上天留下他這個有用之身，他說絕不會退下火線。