在物質氾濫的年代，有人追逐潮流，貪新厭舊；有人卻將舊物當寶，人棄我取。簇新抑或陳舊，視乎你如何看待，上世紀的古物對生於21世紀的現代人可謂完全陌生，是新也是舊。回收舊物約30年的古物店店主馮永權（阿Wing）認為，所謂古老當時興的一股懷舊熱，說穿了只是江郎才盡開倒車的取巧把戲。用心製作、有設計有美感的舊物，只要找對了主人，便得以延續生命。
記者：張珮琪 攝影：梁瑞帆
喜歡搜尋舊物的人相信對阿Wing並不陌生，有裙褂店太子爺偏不做，反叛性格要往外闖，從事過不同工種，一旦缺乏新鮮感便留不住他，就只有收藏及買賣舊物的興趣能歷久常新，30年來他租過多個地方開古物店暨貨倉，態度從來沒變，對於「對到嘴」、惜物之人，將舊物轉贈又何妨？只要收入夠交租，不愁兩餐便足夠。
現時位於土瓜灣九龍城道工廈的3,000多呎古物店，取名「夕拾」，是借用近代著名作家魯迅回憶其童年往事的散文集《朝花夕拾》，店主由從前的one man band變成情侶共同經營，夕拾取意他們同樣做着拾舊物的動作。阿Wing女友、本地設計師黎小楓（Sylvia）笑他花心，不像收藏家般專一，未見過的、有故事有回憶的，即使是一個鞋盒都收藏，「我成日都話佢係『貓義工』，救得一件得一件。」
不過，Sylvia也不得不讚嘆阿Wing對舊物的觸覺銳利，「呢啲係佢嘅超能力，有一次踩緊單車，佢睇到夾斗車上面凸咗個手柄出嚟，佢即刻爬上斗，真係見到一架名牌單車，零件係原裝，唔係最新款，但只要泵氣就踩得。」Wing笑謂，一開始只是打算將舊物賣掉便算，誰知越多人知其地址後，「每日都有幾個收買佬上嚟問『我有呢啲呀要唔要？』，好似毒品供應商，然後就開始咗一條不歸路。我初頭一個人去救，救到我死咁滯，攞十萬八萬搵地方儲存，到冇錢救，𠵱家發散接收。」阿Wing口中的發散接收，是Sylvia的提議，「擺上fb group睇吓邊個嚟要，消息一出，啲人就會自己埋嚟搵我，民間有好多人做緊呢樣嘢。」
Sylvia認為古物店的角色是回收中心，將資源再分配，「有啲係全新、有啲係寶、有啲舊物係有歷史文化價值，搵一個啱嘅人去延續舊物嘅生命。報紙雜誌校刊成績表都係香港社會嘅一啲紀錄，有學者會借嚟做學術研究，有時好多老人院嚟借舊物勾起老人家記憶，我哋都好開心。」
阿Wing慨嘆：「好多人覺得做呢啲，免費返嚟，整理之後就可以賣好多錢。有幾多人買至得㗎，啲人又唔知道我哋整理、收藏、排列，唔知幾時先有人見到佢！」Sylvia連忙補充：「可能30年前買返嚟嘅嘢到𠵱家都仲喺度。」阿Wing還會拾級上唐樓的板間房，抵着積塵污垢，搬搬抬抬致損手爛腳；下雨天也要保住十個卡板的國民黨內附將軍簽名的書籍等等，但一旦要計較時間金錢、付出與收入不成正比，「你就唔會覺得做呢件事會好開心。」
他們希望感染到社會上的人懂得分享，「好多人會覺得如果淨係我有嘅，我賣幾多錢都得。我哋就係要推冧個巿場，等人哋唔好成日以為得佢有，我仲多過佢，普及化啲，唔係要嚟炒，所以我哋出咗名好麻煩。」阿Wing引述趕客例子，友人帶來另一位朋友前來購物，對方向阿Wing提議：「我第一次幫襯你，你平啲畀我吖，我將來會幫你買好多。」此言一出即惹怒他，「我話，你係我朋友帶入嚟，如果你下次一個人嚟，我係門都唔會開畀你，你唔好以為你有錢，同我買件咁嘅嘢，就喺度畀面口，客人永遠是對的呢啲態度，我唔受呢套㗎，你最好下次唔好再嚟！掉返轉頭，你第一次嚟買，大家順順利利開開心心，以後我送畀你都唔係問題。」
事實上，從前的阿Wing是會以拳頭來解決問題的，而Sylvia相對理性，會提出辦法避免麻煩，阿Wing笑說：「佢制止住我嘅無知、白癡、自以為是。同埋佢話畀我知佢哋後生呢代諗嘢嘅方式，唔會同年輕客人有代溝。」
懂他的人自然會懂，有客人曾向他說：「你唔好唔做啊，你唔做冇人做㗎喇。」更會付出雙倍價錢購買舊物以行動支持。秉持不獨食的理念，阿Wing曾一心扶持欲入行的小伙子，適逢他要搬店，對方稱朋友有地方可存放舊物，又可當場地佈景讓人拍攝，他答應了。但結果對方沒將舊物歸還，直至阿Wing向對方查問，他回答：「嗰次嗰堆嘢已經冇咗㗎喇。」後來他得知對方將該堆舊物賣了，大感失望。Sylvia說：「可能佢哋有自己一套說話方式，覺得唔使講清楚。我想盡量清楚啲，賣就賣，送就送，會免咗好多誤會同傷感情嘅事。」
記者問阿Wing有否粗略統計過舊物數量有多少，不似從前報道形容火爆寸嘴的他「回復本色」：「呢個係一個白癡嘅問題，連我自己有幾多嘢我都唔知，你叫我畀個數量你真係……」Sylvia即時解圍：「同埋好難計，一張紙都係一件（物品）。」
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。