俗語有云：一樣米養百樣人，左丁山有不少朋友在1989後移民美加澳紐，有發大達的，有成為高級中產的，有成為路人甲的，不一而足，總之各有命運安排，好難講有錢嗰位係叻仔，冇錢嗰位係笨人。四十幾年來，老友憶念舊情，平時開玩笑，畀人講番讀書時啲瘀嘢，一概接受，一笑置之，不傷感情，點知反送中條例運動徹底改變一切，各人之real colours逐一浮現，見面嗌交，WhatsApp群組互不退讓，於是朋友都冇得做。內地官媒咬定香港青年搞顏色革命，侵犯北京紅線，各朋友間唔慌唔係有顏色革命咯，黃藍白黑見齊，壁壘分明，左丁山有兩個同學群組，便有黃色或藍色同學退組，不相往來，五十年相交，毀於一旦。
探其原因，藍絲傾向搵銀至上，唔好搞我收成期，阿叔仲有大把前途，上京有相公厚我，移民好耐者，更可能受過白人上司氣，𠵱家高唱中國站起來了，中國科技勝過美國，好不威風，面上貼金，可以走出唐人街，向白人舉起手指，於是見到香港竟有人不識時務，反對中央，呢班人梗係收咗錢，畀人哋蠱惑、煽動、唆擺及受失敗教育影響嘅啦。去問邊個出錢呀，答案一定係憎厭中國雄起嘅美國佬，透過CIA黑手搞搞震，英國佬呢就死心不息，煽動殖民餘孽。新愛國人物范徐麗泰咪係左一聲「人地」，右一聲「人地」煽動囉，但從不見范徐氏呢類人澄清「人地」是甚麼人。
有移民朋友回港居留，講兩講就話係有人收錢做事，打前排就日工一萬元正，打後排就兩三千。邊個講㗎：「我拍拿嘅供應商嘅科文，因科文叫技工返工唔好遲到，技工話晚晚做夜工拆牌仲好搵，每晚一萬大洋喎。」講到實牙實齒，仲話我地喺美國都知啦，乜你左丁山咁背，還是詐唔知？於是左丁山問佢，美國警察是否隨時開槍殺人？佢話：「唔可以隨時殺人，會被控謀殺嘅，但美國有好多癲佬揸槍周街行，警察不時被射殺，所以美國警察係好緊張嘅。」香港人有冇槍呢？除咗葉繼歡，只有警察揸槍啫喎，如果市民冇揸槍，美國警察可唔可以開槍？呢位香港裔美國人話：「唔得㗎，會畀人告到飛起！」咪係囉，港美民情不同，近來藍絲倡議警察多開槍，廣推普京一句話：「我的責任是送佢地見上帝！」真嚇死人！啲深藍現在係要見到死人先至拍掌稱快，咪叫劉業成下格殺勿論命令囉，林鄭夠唔夠膽孭？